Sarimsoq, asal, D vitamini: ularning qaysi biri immunitet tizimini mustahkamlaydi, qaysi biri yo‘q?

^{Foto: «Noviy ochag»}
Ehtimol, insonlar immunitet haqida koronavirus paydo bo‘lmasidan avval bunchalik ko‘p qayg‘urmagandir. Haqiqatan ham xavfli kasallikni deyarli hamma joyda yuqtirish mumkin bo‘lgan vaziyatda, organizmning chaqirilmagan mehmonlarni qaytarish qobiliyati har qachongidan ham muhimroq.

Shifokorlarning ogohlantirishicha, ko‘pchilikka ma’lum bo‘lgan immunomodulyatorlarning aksariyati ish bermaydi. Immunitetni mustahkamlashning eng yaxshi usuli jismoniy mashqlar, toza havoda yurish, to‘g‘ri va to‘yimli ovqatlanishdir. Ammo ommalashgan usullar haqida nima deyish mumkin? «Noviy ochag» nashri ulardan qaysi biri haqiqatan ham yordam berishini va qaysi biri, afsuski, foydasiz ekanini aniqladi.

Olma

Mashhur maqollarda aytilganidek, olma haqiqatan ham foydalimi? Shubhasiz, undagi vitaminlar sog‘liq uchun foydali va kletchatkalar ovqat hazm qilishga yordam beradi. Bundan tashqari, olma po‘sti tish va milkdan xavfli qoplamalarni olib tashlaydi, bu nafaqat og‘iz bo‘shlig‘i salomatligi, balki yurakni himoya qilish uchun ham foydalidir. Ammo immunitet haqida nima deyish mumkin? Antioksidantlar, vitamin C (ayniqsa nordon olmada) va rux immunitet tizimi uchun haqiqatan ham foydali bo‘lgan olma tarkibidagi asosiy komponentlardir. Shuning uchun kuz va qishda kuniga kamida ikkita olma iste’mol qilish tavsiya etiladi.

D vitamini

Bu vitamin haqida nimalarni bilamiz? Suyaklarning salomatligi va mustahkamligi uchun muhim, metabolik jarayonlar uchun zarur, mushak va bosh og‘rig‘ini yengishga yordam beradi. Bu yilgi bir nechta tadqiqotlar D vitamini koronavirus bilan kasallanmasdan oldin immunitetni oshirishda muhim rol o‘ynashini tasdiqladi. D vitamini burun shilliq qavatining himoya funksiyasini oshirish qobiliyatida — virusning nafas olish tizimi yo‘lidagi birinchi to‘siqdir. Ammo shifokorlarning ta’kidlashicha, D vitaminining ortiqcha miqdori uning yetishmasligi kabi xavfli bo‘lishi mumkin. Bu qonda kalsiyning to‘planishiga va natijada qon quyqalarining shakllanishiga olib keladi.

Asal

Xalq tabobatidagi eng keng tarqalgan dori vositalaridan biri — bu asal. U ko‘pincha O‘RVI, gripp va boshqa turdagi kasalliklarda tavsiya etiladi. Lekin bu haqiqatan ham foydalimi? Afsuski, aksincha: shakar, shu jumladan tabiiy asalda mavjud bo‘lgan shakar immunitet tizimini mustahkamlamaydi, balki susaytiradi va shu bilan organizmning himoya qobiliyatini pasaytiradi. Shuning uchun asal bilan ehtiyot bo‘lish va uning iste’molini haddan tashqari oshirib yubormaslik lozim.

Exinatseya

Exinatseya gulining quritilgan ildizlari va barglaridan olingan damlama yoki ekstrakti ham foydali. Ammo tadqiqotlar faqat ushbu qo‘shimchaning virusli kasalliklarning davomiyligini qisqartirish va yengil o‘tishida samaradorligini tasdiqladi. Profilaktik chora-tadbirlarga kelsak, afsuski, bu hali tasdiqlanmagan. Agar allaqachon kasal bo‘lsangiz ushbu damlamani qabul qilish mumkin, albatta, shifokor bilan maslahatlashgandan so‘ng. Ammo, afsuski, immunitetni mustahkamlash uchun foydasiz.

Sarimsoq

Gripp va O‘RVIning oldini olish uchun tavsiya etilgan birinchi vosita sarimsoqdir. U kasallikni samarali daf qiladi, ammo bu viruslarga qarshi yordam beradimi? Sarimsoq ruxni o‘z ichiga oladi, bu o‘z navbatida immunitet tizimining holatiga foydali ta’sir ko‘rsatadi va tashqi hujumlarni yaxshiroq yengishga yordam beradi. Bundan tashqari, yaqinda o‘tkazilgan tadqiqot rux yetishmovchiligi koronavirusning yanada og‘ir kechishiga hissa qo‘shishini va hatto o‘lim xavfini oshirishini tasdiqladi. Shuning uchun sarimsoqni, albatta, unga qarshi ko‘rsatmalar bo‘lmasa, ratsionga kiritish tavsiya etiladi. “Zamin” yangiliklarini “Telegram”da kuzatib boring