Toshkent shahrida haydovchiga bolg‘a bilan hujum qilgan ayol sud hukmi bilan bir yarim yilga ozodlikdan mahrum etildi, deb xabar berdi sud manbalari.
Nizo aprel oyida Yunusobod tumanida sodir bo‘lgan bo‘lib, u ijtimoiy tarmoqlarda katta shov-shuvga sabab bo‘lgan edi. Ma’lumotlarga ko‘ra, Spark va Matiz avtomobillari o‘rtasidagi kichik yo‘l-transport hodisasidan so‘ng ayol haydovchi asabiylashib, Matiz haydovchisiga bolg‘a bilan hujum qilgan.
Videolavhada u avtomashinasidan tushib, boshqa haydovchining oynalarini sindirishi va boshiga bir necha marta zarba berishi aks etgan. Natijada jabrlanuvchi yengil miya chayqalishi tashxisi bilan shifoxonaga yotqizilgan.
Sud jarayonida har ikki tomon bir-birini janjalni boshlaganlikda aybladi. Ayol esa harakatini himoya sifatida izohlab, hodisada temir bolg‘a ishlatganini tasdiqladi.
Oliy sud hukmiga ko‘ra, u Jinoyat kodeksining 277-moddasi (bezorilik) bo‘yicha aybdor deb topilib, bir yil olti oyga ozodlikdan mahrum qilindi. Shuningdek, u jabrlanuvchiga yetkazilgan zarar uchun 5 million 300 ming so‘m tovon to‘laydi.
“Zamin”ni Telegramʻda oʻqing!
