Gʻazo bilan chegaradagi qishloqdan oʻnlab jasadlar topildi

^{Foto: Ilia Yefimovich / dpa / Scanpix / LETA}

Kfar-Aza — Sderot shahri yaqinida, Gʻazo sektoridan ikki kilometr masofada joylashgan kibuts (kommuna). 2023 yil 7 oktyabr kuni kibutsga HAMAS a'zolari hujum qilgan, mahalliy aholi vakillarining bir qismi oʻldirilgan, yana bir qismi garovga olinib, Gʻazo sektoriga olib ketilgan. Isroillik harbiylar bu hududni qaytarib olishi uchun ikki kunga yaqin vaqt ketgan.

10 oktyabr kuni Isroil mudofaa armiyasi qariyb ikki kunlik janglardan keyin mamlakat janubida, Gʻazo sektoridan bir necha kilometr masofada joylashgan Kfar-Aza kibutsini ozod etdi. Bu hudud 7 oktyabr kuni Isroilga hujum qilgan HAMAS a'zolari yoʻlidagi ilk nishonlardan biri boʻlgandi.

Hudud qaytarib olingach, bu erga jurnalistlar kirishiga ruxsat berildi. Ular bu erda halok boʻlgan tinch aholi vakillari, jumladan, ayollar va bolalarning jasadlari ustidan chiqishgan. OAV va SAHAL vakillari bu erda boʻlgan voqealarni qirgʻin deb atamoqda.

The New York Times nashri yozishicha, oʻz klubi va sinagogiga ega Kfar-Aza kibutsida urushga qadar 750 kishi yashagan. Gʻazo sektoriga yaqin joylashgani va doimiy raketa zarbalariga qaramay, mahalliy aholi odatiy turmush tarzini kechirgan. Hammayoqda beton boshpanalar bor, uylar esa xavfsizlik xonalari bilan jihozlangan. Isroilliklardan hech biri HAMAS a'zolari chegaradan oʻtib, odamlarni oʻldira boshlashini tasavvur qila olmasdi, deb qayd etadi BBC.

Falastinliklar chegarani mototsikllarda kesib oʻtishgan, shuningdek, kibuts hududiga deltaplanlarda uchib kelishgan. Gʻazoga eng yaqin boʻlgan hududda mudofaa liniyasi joylashgan boʻlib, bu erda mahalliy aholi vakillaridan iborat otryad navbatchilik qilgan. Ular falastinliklarning ilk qurbonlariga aylangan. Gʻaflatda qolgan Isroil armiyasi qismlari Kfar-Azaga etib borishi uchun 12 soat vaqt ketdi, deb hikoya qiladi desantchilarning shturm guruhi komandiri oʻrinbosari Davidi Ben Sion. Janglar ikki kunga yaqin vaqt davom etgan.

Sky News muxbiri Styuart Remzining soʻzlariga koʻra, shturm vaqtida oʻz uylarida uxlab yotgan odamlar falastinliklarning ovozlaridan uygʻongan va oʻz bolalarini shkaflarga, vino omborlariga va ertoʻlalarga yashirishgan. Koʻpchilik oʻzini himoya qila olmagan. Ular harbiylar yordamini 17 soatdan ortiq vaqt davomida kutishgan.

«Hammayoqda jasadlar. Kibuts aholisi orasida oʻldirilganlar juda koʻp – erkaklar, ayollar, bolalar. Ularning qoʻllari bogʻlangan, ular otib tashlangan», – deya hikoya qiladi oʻz reportajida CNN korrespondenti Nik Robertson.

Kibutsda halok boʻlganlar orasida er-xotin Itay va Adar Berdichevski ham bor, ularning hikoyasi Isroil nashrlarida keng tarqaldi. Oila Kfar-Azada oʻn oylik egizaklari bilan yashashgan. Professional harbiy boʻlgan Berdichevskilar hujum vaqtida chaqaloqlarni xavfsizlik xonasiga yashirishga ulgurgan, lekin ular uyga bostirib kirgan jangarilar bilan otishmada halok boʻlgan. 13 soat oʻtib, egizaklar qarindoshlari tomonidan topilgan.

«Bu urush emas va jang maydoni ham emas. Bu qirgʻin, – degan NYT muxbiriga Isroil armiyasi general-mayori Itay Veruv. – Men hayotimda bunaqasini koʻrmaganman, bu bizning bobolarimiz va buvilarimiz qirgʻiniga ham oʻxshab ketadi».

Isroil mudofaa armiyasi Kfar-Aza kibutsida halok boʻlganlar sonini aniq keltirmagan. Kibutsdan ilk reportaj 10 oktyabr kuni Isroilning i24News telekanali tomonidan namoyish etildi. Uning muxbiri Zaka qidiruv-qutqaruv tashkiloti koʻngillilari ma'lumotiga asoslanib, Kfar-Azada tinch aholi vakillari boʻlgan 200 ga yaqin kishining jasadi topilgani haqida ma'lumot berdi.

Soʻnggi ma'lumotlarga koʻra, Isroilda halok boʻlganlar soni 1300 ga etgan, yana bir necha ming kishi yaralangan. HAMAS a'zolari garovga olgan taxminan 150 kishining taqdiri noma'lumligicha qolmoqda.

Шухрат Раззаков

«ZAMIN.UZ» muharriri