O‘zbekiston hukumati asosiy iste’mol tovarlari narxini barqarorlashtirishga qaratilgan chora-tadbirlarni e’lon qildi. Ushbu bayonot mamlakatda oziq-ovqat va xizmatlar narxining ortib borayotganligi fonida yangradi.
Rasmiylarning tan olishicha, bu o‘sish inflyatsiya darajasidan ancha yuqori bo‘lmoqda. 24-oktabr kuni tashkil etilgan matbuot anjumanida Markaziy bank boshqaruvi raisi Timur Ishmetov iqtisodiy vaziyat bo‘yicha tahlilni taqdim etdi.
Uning so‘zlariga ko‘ra, 2023-yil sentyabr oyida yillik inflyatsiya 8 foizga tushgan bo‘lsa-da, bu 2022-yildan buyon eng past ko‘rsatkichdir, ammo ijtimoiy ahamiyatga ega tovarlar narxi xavotirli sur’atlarda oshmoqda. Xususan, yil davomida mol go‘shtining narxi 23,2 foizga, kartoshka narxi 18,5 foizga, benzin esa 11,8 foizga qimmatlagan.
“Iste’mol tovarlari va narxlarni barqarorlashtirish bo‘yicha tegishli vazirlik va idoralar bilan amaliy chora-tadbirlar amalga oshirilmoqda”, — dedi Ishmetov. Moliya regulyatori rahbari uzoq muddatli narx barqarorligini ta’minlash uchun inflyatsiyaning chuqur sabablari, xususan, taklif sohasidagi muammolarni bartaraf etish zarurligini ta’kidladi.
Ichki bozorda raqobatni rivojlantirish, tarif va notarif savdo to‘siqlarini bosqichma-bosqich kamaytirish hamda import tarkibidagi konsentratsiyani pasaytirish asosiy yo‘nalishlardan biri sifatida belgilandi. Ishmetovning so‘zlariga ko‘ra, energiya resurslari yetkazib berish barqarorligini ta’minlash va transport infratuzilmasini modernizatsiya qilishga alohida e’tibor qaratiladi.
Bu esa logistika xarajatlarini kamaytirishga va iste’mol tovarlari yakuniy narxiga ijobiy ta’sir ko‘rsatishi kutilmoqda. Markaziy bank inflyatsiya bo‘yicha uzoq muddatli prognozlarni ham ma’lum qildi.
2026-yil oxiriga kelib narx oshish sur’ati 7 foizgacha pasayishi kutilmoqda. Tashqi inflyatsion bosimning kamayishi va milliy valyutaga bo‘lgan ishonchning mustahkamlanishi 2027-yilga kelib 5 foizlik maqsadli ko‘rsatkichga erishishga, 2028-yildan boshlab esa uni ushlab turishga yordam beradi.
Markaziy bank sentyabr oyidagi natijalarga oid infografika orqali ijobiy o‘zgarishlarni ham ko‘rsatdi. Jumladan, narxi 10 foizdan ko‘proq oshgan tovarlar ulushi avgust oyidagi 18 foizdan 14 foizga pasaygan.
Iste’mol savatchasidagi mahsulotlarning 86 foizi narxi 10 foizdan kam oshgan. Ammo xizmatlar sohasida vaziyat murakkabligicha qolmoqda: taxminan yarmidan ko‘p xizmatlar narxi 10 foiz va undan yuqori darajada oshgan.
Yillik narx dinamikasi tahlili bo‘yicha eng ko‘p qimmatlagan xizmat va mahsulotlar ro‘yxati tuzildi. Eng katta o‘sish haydovchilik kurslari narxida (+73,3%) kuzatilgan.
Keyingi o‘rinlarda sabzi (+57,5%) va ichki aviaqatnovlar (+57,3%) joylashgan. Ro‘yxatni limon (+52,5%) va tarmoq gaz narxi (+39,2%) yakunlagan.
“Zamin”ni Telegramʻda oʻqing!
Ctrl
Enter
Xato topdIngizmi?
Iborani ajratib Ctrl+Enter tugmasini bosing 
