Ispaniyaning mashhur klubi “Real Madrid” oktabr oyining eng yaxshi futbolchisini e’lon qildi. Klubning rasmiy sayti xabariga ko‘ra, bu mukofotga turkiyalik yosh iste’dod Arda Guler loyiq deb topildi. U joriy oy davomida maydondagi faol o‘yini va samarali paslari bilan jamoasiga muhim hissa qo‘shgan.
Arda Guler 2005-yil 25-fevralda Turkiyaning Anqara shahrida tug‘ilgan. Futbolchi Turkiya Superligasida yoshiga qaramay yorqin o‘yin ko‘rsatib, “Real Madrid” jamoasining e’tiborini tortdi. 2023-yilning yozida u 18 yoshida “Real Madrid” bilan shartnoma imzoladi.
Guler o‘zining texnikasi, driblingi va zarba aniqiligi bilan tanilgan. U jamoada yarim himoyachi sifatida harakat qilib, tezkor qaror qabul qilishi va o‘yin ritmini boshqarish qobiliyati bilan ajralib turadi. Shu sababli madridlik muxlislar uni “yangi Modrich” deb atay boshlashgan.
Mutaxassislar uning kelajagi porloq ekanini, u nafaqat klub, balki Turkiya futbolining ham kelajakdagi asosiy yuzlaridan biriga aylanishi mumkinligini ta’kidlashmoqda.
“Zamin”ni Telegramʻda oʻqing!
