AQSH NATOning sharqqa kengaymasligiga rozi: Ukrainaga umid bormi?

Qo‘shma Shtatlar rasmiylari NATOning sharq tomon kengayishi borasida Rossiya tomonidan bildirilgan xavotirlarni asosli deb tan oladi va bu masalani Ukraina mojarosini tinch yo‘l bilan hal qilish jarayonida muhokama qilishga tayyor. Bu haqda AQSH prezidentining Ukraina masalalari bo‘yicha maxsus vakili Kit Kellog ABC News telekanaliga bergan intervyusi davomida bildirdi.

Maxsus vakilning so‘zlariga ko‘ra, AQSH hukumati bir necha bor Ukraina NATOga qabul qilinishi masalasi hozirda kun tartibida emasligini ta’kidlagan. Bunga alyansga a’zo boshqa bir qator mamlakatlar ham xuddi shu pozitsiyani tutishmoqda.

Kit Kellog o‘z intervyusida, shuningdek, Rossiya prezidenti Vladimir Putinning G‘arb mamlakatlaridan NATOning sharqqa kengaymasligi haqida yozma kafolat olish istagini ham eslatib o‘tdi. Agar bu talab Rossiya va Ukraina o‘rtasidagi urushni tugatish uchun zarur shartga aylansa, AQSH prezidenti Donald Tramp uni bajarishga tayyorligini ma’lum qilgan. Qolaversa, AQSH rasmiylari bu masalada yanada qat’iy pozitsiyani namoyish qilib, nafaqat Ukraina, balki Gruziya va Moldovaning ham NATO a’zoligiga qabul qilinishidan voz kechishga tayyor ekanligini bildirdi.

Shuningdek, yaqinda Istanbul shahrida bo‘lib o‘tishi kutilayotgan Rossiya-Ukraina tinchlik muzokaralarining ikkinchi bosqichida bir qator dolzarb masalalar muhokama qilinishi rejalashtirilgan. Bular orasida NATO masalasi bilan bir qatorda Qrim yarim orolining taqdiri, Donetsk, Luhansk, Zaporijjya va Xerson viloyatlarining kelajagi ham bor.

Ukraina delegatsiyasiga mazkur muzokaralarda mamlakatning mudofaa vaziri Rustem Umerov rahbarlik qiladi. Tomonlarning ushbu uchrashuvidan jiddiy natijalar kutilayotgani va bu muzokaralar tinchlikni tiklash uchun muhim qadam bo‘lishi mumkinligi ta’kidlanmoqda.

Shu bilan birga, AQSH maxsus vakili Donald Trampning ushbu muzokaralar jarayonidan chiqishi ehtimoli haqida ham gapirib o‘tdi. Uning so‘zlariga ko‘ra, agar AQSH prezidenti muzokaralar jarayonida vaziyat o‘zgarmay qolganini va undan faqat "foydalanishayotganini" his qilsa, tinchlik muzokaralari jarayonini Yevropaga topshirishi mumkin.

Bu esa xalqaro kuzatuvchilarning fikriga ko‘ra, tinchlik o‘rnatish jarayonida muhim burilish nuqtasi bo‘lishi mumkin. Har holda, bu kabi muzokaralarning natijalari nafaqat Rossiya va Ukraina, balki butun Yevropa qit’asi xavfsizligi uchun o‘ta muhim ahamiyat kasb etadi. Shu bois, yaqinlashib kelayotgan Istanbul muzokaralari butun dunyo jamoatchiligining diqqat markazida bo‘lib turibdi. “Zamin”ni Telegramʻda oʻqing!