Madridning “Real” klubi bosh murabbiyi Alvaro Arbeloa jamoaning joriy mavsumdagi natijalari yuzasidan fikr bildirdi. Mutaxassis soʻzlarida ochiqlikni saqlagan holda, ayrim uchrashuvlarda yoʻqotilgan ochkolar jamoa uchun eng katta muammo ekanini taʼkidladi.
— Menimcha, umumiy baho berishni jurnalistlar amalga oshirishi kerak. Men esa oʻz ishim haqida gapirishga tayyorman. Ha, biz bir qator oʻyinlarda gʻalaba qozona olmadik, ayniqsa, ochko yoʻqotmasligimiz shart boʻlgan raqiblarga qarshi bahslarda. Aynan shunday oʻyinlar eng koʻp afsus uygʻotadi, — dedi Arbeloa.
Uning taʼkidlashicha, jamoa kuchli raqiblarga qarshi uchrashuvlarda yaxshi oʻyin namoyish etmoqda. Biroq pastroq darajadagi jamoalarga qarshi keraksiz ochko yoʻqotishlar chempionlik poygasida jiddiy muammoga aylanmoqda.
— Biz teng va kuchli raqiblarga qarshi eng yaxshi oʻyinlarimizni koʻrsatyapmiz. Lekin La Ligada chempionlik uchun kurashmoqchi boʻlsak, “Real” baʼzi oʻyinlarda ochko yoʻqotishga haqli emas. Shu jihat biz uchun ogʻriqli nuqta boʻlib qolmoqda, — deya qoʻshimcha qildi murabbiy.
Arbeloa shuningdek, jamoada nazorat qilish qiyin boʻlgan holatlar tez-tez takrorlanayotganini ham tan oldi. U bu holatni soʻnggi oʻyinlar misolida tushuntirdi.
— Baʼzi vaziyatlar borki, ularni toʻliq nazorat qilish mushkul va ular takrorlanyapti. Buni oʻtgan hafta “Betis” (1:1) va “Jirona” (1:1)ga qarshi bahslarda ham koʻrdik. Boshqa oʻyinlarda ham shunga oʻxshash holatlar uchradi. Lekin bu bizda oʻsish va rivojlanish uchun hali imkoniyatlar borligini koʻrsatadi, — dedi u.
Murabbiyning bu ochiq bayonoti “Real”da hali yechim talab qiladigan muammolar mavjudligini anglatadi. Endi jamoa oldidagi asosiy vazifa — barqarorlikni tiklash va hal qiluvchi pallada ochko yoʻqotmaslik.
“Zamin”ni Telegramʻda oʻqing!
