Эрдўған ғарбни Россия билан можарони «назоратсиз авж олдириш»да айблади

^{Эрдўған НАТО саммитида. Фото: tmgrup.com.tr}
Ғарб давлатларининг Россияга нисбатан салбий муносабати Украинадаги ҳарбий можарони тинч йўл билан ҳал қилишга халақит бериб, уруш «назоратсиз авж олиши»га сабаб бўлмоқда, деган Туркия президенти Ражаб Тоййиб Эрдўған.

«Ғарблик айрим иттифоқчиларнинг муносабати оловга ёғ сепгандек бўлди. Бу Украинага фойдадан кўра кўпроқ зарар келтирди», — деган Эрдўған Newsweek журналига берган интервюсида. Унинг қайд этишича, НАТОнинг бошқа давлатларидан фарқли ўлароқ, Туркия «тинчликни яқинлаштириш учун можаронинг ҳар икки томони билан ҳам мулоқот ўтказмоқда».

«Табиийки, биз Россия президенти Владимир Путиннинг ҳар қандай гапига ҳам кўнавермаймиз. Лекин бизда масалаларни муҳокама қилиб, уларни ҳал қилишнинг негизига киришиш имконияти бор», — деган Эрдўған. У 2022 йилда Туркия Анқара ва Истанбулда томонларга сулҳ музокаралари учун майдон ажратганини эслатиб ўтган.

Туркия президенти ҳозирги ҳолатда НАТО ва Россия ўртасида тўғридан тўғри зиддият хавфи пайдо бўлаётганидан хавотирда эканини маълум қилган. «Бундай оқибатларга олиб келадиган ҳар қандай қадамлардан онгли равишда воз кечиш керак», — деб таъкидлаган Туркия етакчиси.

Бунгача Эрдўған Путин тинчликни истаб турган бир пайтда Ғарб давлатларини Украинадаги можаро билан боғлиқ вазиятда учинчи жаҳон урушини келтириб чиқаришга уринаётганликда айблаган эди.

Ўз навбатида, Туркия президенти Россия ва Украина ўртасидаги урушни якунлашга имкон берадиган муроса учун «асос яратиш»га тайёр эканини билдирган. Унинг қайд этишича, аввалига Москва ва Киев ўт очишни тўхтатишга келишишлари мумкин, шундан сўнг ҳар икки томонни қониқтирувчи адолатли сулҳ шартномаси сари юз тутишади.

Июн ойида Қозоғистонда бўлиб ўтган ШҲТ раҳбарлари саммитида Эрдўған Путинни «имкон қадар тезроқ» Туркияга меҳмонга келишга чорлаган эди. РИА Новости’нинг турк дипломатлари орасидаги манбаларининг маълумотига кўра, Туркия Путинга Украина етакчиси Володимир Зеленский билан сулҳ шартномасига киришишни таклиф этишга ҳозирланмоқда. Бу ҳолатда Туркия томонларнинг ҳеч бирига можарони ҳал қилиш бўйича ўз ғояларини тақдим этмайди, шунчаки «зарур воситачилик» қилади. Шунингдек, Эрдўған Россия ва Украина иштирокидаги тинчлик саммитини ташкиллаштиришни ҳам таклиф қилган эди. “Замин” янгиликларини “Youtube”да кузатиб боринг