20:02 / 26.03.2025

Трамп Россия сулҳга эришишни чўзаётгани ҳақида гапирди

АҚШ президенти Доналд Трамп Россия Украина билан ўт очишни тўхтатиш тўғрисидаги келишувни имзолашни атайлаб кечиктираётганини истисно қилмади.

«Билмадим. <…> Менимча, Россия [бу урушга] чек қўймоқчи, аммо, у вақт чўзаётган бўлиши мумкин. Биласизми, мен ҳам кўп йиллар давомида шундай қилиб келганман: „Мен келишув имзолашни хоҳлайман, мен ўйинда қолишни истайман, аммо, мен буни хоҳламаётган бўлишим ҳам мумкин“.

Ишончим комил эмас. Аммо барибир ўйлайманки, Россия бунинг тугашини хоҳлайди ва яна ўйлайманки, [Украина президенти Володимир] Зеленский бунинг барчаси якунланишини хоҳлайди», — деган Трамп Newsmax учун интервюда.

У томонлар ҳар ҳафта ўртача жами 2500 нафар аскар йўқотаётганини қўшимча қилган.

«Улар америкаликлар эмас, аммо мен бунга шу нуқтайи назардан қарамайман. Мен фронтдан келаётган фотосуратларни кўряпман, уларни кўрмаганим яхши эди. Қўллар, оёқлар ва бошлар ҳар ерда сочилиб ётибди. <…> Мен шунчаки бу тўхташини истайман», — дея қўшимча қилган АҚШ президенти.

АҚШ 11 март куни Саудия Арабистонида Украина билан музокаралар чоғида бутун фронт чизиғида 30 кунлик ўт очишни тўхтатишни таклиф қилганди. Киев бу таклифни қўллаб-қувватлади. Россия президенти Владимир Путин ҳарбий ҳаракатларни тўхтатиш таклифига рози экани, бироқ бу «узоқ муддатли тинчлик»ка олиб келиши кераклигини айтди. Путиннинг Трамп билан музокаралари якунида фақат энергетика объектларига зарба беришни тўхтатишга қарор қилингани маълум бўлди.

Кремл ва Россия мудофаа вазирлиги энергетика объектларига зарба беришга вақтинчалик мораторий Россия ва АҚШ президентлари келишиб олган 18 мартдан бери амал қилаётганини таъкидламоқда. Шу билан бирга, Украина президенти Володимир Зеленский энергетика объектларига зарба беришни тўхтатиш тўғрисидаги келишувга 25 мартдан амал қила бошлашганини айтди. Сўнгги кунларда Россия мудофаа вазирлиги мунтазам равишда Украинани энергетика объектларига зарба беришда айбламоқда.

23-25 март кунлари Саудия Арабистони пойтахти Ар-Риёдда АҚШнинг Россия ва Украина делегациялари билан учрашувлари бўлиб ўтди. АҚШ вакиллари Украина делегацияси билан алоҳида, Россияники билан алоҳида музокаралар ўтказган. Уларнинг якунларига кўра Вашингтон Киев ва Москва билан Қора денгизда хавфсиз кема қатновини таъминлаш, куч ишлатмаслик ва тижорат кемаларидан ҳарбий мақсадларда фойдаланмаслик бўйича келишиб олган.