Украина президенти Володимир Зеленский Вашингтонда АҚШ президенти Доналд Трамп билан бўлиб ўтган учрашувдан сўнг журналистлар билан суҳбатда муҳим баёнот берди. Унинг сўзларига кўра, Киев ва Вашингтон Tomahawk қанотли ракеталарни Украинага етказиб бериш масаласини муҳокама қилмаган — чунки АҚШ “кескинлашувни истамайди”.
“Биз бу ҳақда гаплашмасликка келишиб олдик. Америка эскалацияни хоҳламайди”, — деди Зеленский. Шу билан бирга, у Украина бу ракеталарни олиш нияти борлигини таъкидлади. “Мен оптимист ёки пессимист эмасман — реалистман”, — деб жавоб берди у журналистларнинг саволига.
Украина раҳбари Трамп билан Россиядаги энергетика объектларига зарба бериш масаласини ҳам муҳокама қилмаганини билдирди. Унга кўра, асосий мавзулар хавфсизлик кафолатлари ва Украина учун барқарор тинчликни таъминлаш бўлган.
“Ҳатто агар ўт очишни тўхтатишга эришсак ҳам, биз Путиннинг янги тажовузига тайёр туришимиз керак. Шунинг учун АҚШдан аниқ хавфсизлик кафолатлари зарур бўлади”, — деди Зеленский.
Президент ҳудудий масалаларни урушдаги “энг оғир нуқта” деб атади. “Руслар бутун ҳудудни эгаллаб олишни хоҳлайди. Аммо тинчлик музокараларигача айрим келишувларга эришиш зарур. Биринчи қадам — ўт очишни тўхтатиш”, — деди у.
Учрашувдан сўнг Зеленский Европа етакчилари билан ҳам телефон орқали мулоқот қилди. Суҳбатда Европа комиссияси раиси Урсула фон дер Ляйен, Германия канцлери Фридрих Мерц, Финландия президенти Александр Стубб ҳамда Буюк Британия, Италия, Норвегия ва Польша бош вазирлари, шунингдек НАТО бош котиби Марк Рютте иштирок этди.
Кузатувчилар фикрича, Зеленскийнинг бу баёноти Украина ва АҚШ ўртасидаги стратегик муносабатларда мувозанат сақлашга қаратилган дипломатик сигнал сифатида баҳоланмоқда — Вашингтон Киевни қўллаб-қувватлашда давом этмоқда, аммо урушни янги босқичга олиб чиқишни хоҳламайди.
“Zamin”ни Telegram'да ўқинг!
