Бугун, 5 сентябр куни, Ўзбекистон миллий терма жамоаси бош мураббийи Тимур Кападзе 44 ёшни қарши олди. Унинг ҳаётидаги ушбу муҳим сана ўзи бошқараётган жамоа учун ҳам ёдда қоларли кун бўлди.
Миллий терма жамоа аъзолари устозлари учун ўзгача туҳфа тайёрлашди — Қирғизистонга қарши «Олимпия» стадионида кечган CAFA Nations Cup баҳсида йирик 4:0 ҳисобида зафар қозонишди. Бу ғалаба нафақат финалга йўлланма, балки мураббий учун ҳам ҳақиқий байрам совғаси бўлди.
Учрашув давомида стадион атмосфераси ўзгача руҳ билан тўлди. Мураббийнинг оила аъзолари ҳам трибунадан жой эгаллаб, алоҳида қувончга шерик бўлишди. Улар кўтарган баннер барча мухлисларнинг диққатини ўзига қаратди. Унда катта ифтихор билан: «Бизнинг қаҳрамон дадамиз бор. Туғилган кун билан», — деган сўзлар ёзиб қўйилганди.
Футболчиларнинг майдондаги меҳнати ва оила аъзоларининг самимий қўллаб-қувватлови Тимур Кападзе учун ушбу сана тарихда алоҳида из қолдириши шубҳасиз. Шу тариқа, 44 ёшга қадам қўйган мураббий ўз туғилган кунини шогирдлари билан биргаликда ёдда қоларли ғалаба билан нишонлади.
“Zamin”ни Telegram'да ўқинг!
