Кунига 7 минг қадам – саратон хавфини 11 фоизга пасайтиради

Оксфорд университети олимлари саратон касаллигига қарши энг оддий ва барчага очиқ профилактик йўл – мунтазам пиёда юришни ўрганишга бағишланган кенг қамровли тадқиқотни эълон қилди. Таъкидланишича, ҳар куни 5–9 минг қадам юриш орқали инсон организмида хавфли ўсмалар пайдо бўлиши эҳтимоли кескин камаяди.

British Journal of Sports Medicine нашрида чоп этилган ушбу илмий иш Буюк Британиядаги 85 минг нафар инсоннинг ҳаёт тарзи ва саломатлиги устидан 6 йил давомида кузатув олиб бориш орқали олинган ишончли маълумотларга асосланган. Олимлар фитнес-трекерлар ёрдамида иштирокчиларнинг жисмоний фаоллигини аниқ ўлчашга эришган – бу эса аввалги тадқиқотлардан фарқли ўлароқ натижаларни янада аниқ ва илмий ишончли қилишга хизмат қилган.

Қўлга киритилган маълумотлар шуни кўрсатдики, кундалик пиёда юриш қадамлари саратон ривожланиш хавфига бевосита таъсир кўрсатади. Масалан, кунига 5 минг қадам юрганларда муайян турдаги саратон касалликларига чалиниш эҳтимоли сезиларли даражада камроқ бўлган. Кунига 7 минг қадам босиб ўтганларда бу хавф 11 фоизга, 9 минг қадам юрганларда эса 16 фоизгача пасайгани қайд этилган. Шу билан бирга, 10 минг қадамдан кўпроқ юрган кишиларда натижа янада яхшиланмаган – яъни хавф камайиши бир нуқтада тўхтаб қолган.

Тадқиқотнинг яна бир муҳим жиҳати – юриш тезлиги аҳамиятсиз эканлиги. Яъни, тез ёки секин юришнинг фарқи деярли кузатилмаган. Энг асосийси – мунтазам равишда юриш. Олимлар жигар, эндометрий (бачадон ички қавати), ўпка, сийдик пуфаги, мия, бўйин ва ҳатто ошқозон саратонларига чалиниш хавфи мунтазам юриш туфайли пасайиши мумкинлигини таъкидлашмоқда.

Оксфорд тадқиқотчилари сўнгги хулосаларда одамлар ҳар куни ҳатто 30–40 дақиқалик пиёда юриш билан ҳам ўз соғлиғи учун катта эҳтимолда саратондан ҳимоя яратиши мумкинлигини таъкидлашган.

Zamin.uz таҳририяти саломатлик ва турмуш тарзига оид илмий асосланган тавсияларни сизга етказишда давом этади. Сиз кун давомида неча қадам юрасиз? Саратонга қарши профилактика учун қанчалик жисмоний фаолликни ҳаётингизга киритгансиз? «Замин»ни Telegram’да ўқинг!