Виржиния университети тадқиқотчилари ўтказган 17 йиллик кузатув қариш жараёнининг кутилмаган сабабларидан бирини очиб берди. “Journal of Health Psychology” журналида чоп этилган мақолага кўра, ўсмирлик давридаги тажовузкор хулқ — айниқса дўстларга нисбатан душманона муносабат ва ота билан доимий низолар — биологик қариш жараёнини тезлаштириши мумкин.
Тадқиқот 123 нафар иштирокчи ўртасида олиб борилган. Психологлар 1998 йилдан бошлаб уларнинг ота-онаси ва тенгдошлари билан муносабатларини кузатиб борган. Бир вақтнинг ўзида холестерин миқдори, қон босими, глюкоза даражаси, яллиғланиш белгилари ва қон таҳлили каби биомаркерлар ҳам қайд этилган.
Олимларнинг таъкидлашича, 13 ёшларда дўстларига нисбатан агрессив бўлган, отаси билан мураккаб, тортишувли муносабатда бўлган ўсмирларда 30 ёшларга келиб биологик қариш белгилари анча тезлашган. Айниқса ўсмирлик охиридаги ота билан тинимсиз зиддиятлар ва 20 ёшлар атрофида дўстларга нисбатан агрессия асосий таъсир этувчи омил бўлган.
Мутахассислар бу ҳолат ҳам йигитларда, ҳам қизларда бир хил даражада кузатилганини айтмоқда. Уларга кўра, инсоннинг бошқаларга бўлган муносабати нафақат эмоционал ҳолатини, балки организмнинг қандай тез эскираётганини кўрсатувчи кучли биологик индикаторга айланади.
Олимлар бундай натижалар инсон руҳияти ва жисмоний саломатлик ўртасидаги боғлиқлик янада чуқур эканини яна бир бор тасдиқлаётганини қайд этишмоқда.
Эслатиб ўтамиз, аввалроқ Илон Маск инсон онгини роботларга кўчириш технологияси келаси 20 йилда амалга ошиши мумкинлигини билдириб, уни “рақамли абадийлик” йўлидаги қадам сифатида баҳолаган эди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
