ФИФА Роналдунинг дисквалификациясини эълон қилди
ФИФА Криштиану Роналдунинг Ирландияга қарши ўйинда рақибини тирсаги билан ургани учун дисквалификациясини эълон қилди. У бир ўйинга реал дисквалификация ва яна икки ўйинга шартли дисквалификацияга учради. Роналду аллақачон бир ўйинлик дисквалификацияни ўтаб, келаси йилги жаҳон чемпионатининг биринчи ўйинида иштирок этиши мумкин.
ФИФА интизомий қўмитаси Португалия терма жамоаси ҳужумчиси Криштиану Роналду иши бўйича қарор чиқарди. Ҳужумчи Ирландияга қарши ўтказилган сўнгги ўйинда рақибини тирсаги билан урганлиги учун қизил карточка олган эди.
ОАВнинг хабар беришича, ФИФА Роналдуга бир ўйинга реал дисквалификация ва яна икки ўйинга шартли дисквалификация белгилади. Маълум бўлишича, Криштиану бир ўйинлик дисквалификацияни аллақачон ўтаб бўлди ва Арманияга қарши ўтказилган саралаш босқичининг сўнгги турида майдонга тушмади.
Шунингдек, Португалия терма жамоаси сардори аллақачон келаси йил ёзда бошланадиган 2026-йилги жаҳон чемпионатининг биринчи ўйинида иштирок этиши мумкин. Жаҳон чемпионати финал босқичининг қуръа ташлаш маросими шу йил декабр ойида бўлиб ўтади.
Изоҳлар 0
…