Kuniga 7 ming qadam – saraton xavfini 11 foizga pasaytiradi

Oksford universiteti olimlari saraton kasalligiga qarshi eng oddiy va barchaga ochiq profilaktik yo‘l – muntazam piyoda yurishni o‘rganishga bag‘ishlangan keng qamrovli tadqiqotni e’lon qildi. Ta’kidlanishicha, har kuni 5–9 ming qadam yurish orqali inson organizmida xavfli o‘smalar paydo bo‘lishi ehtimoli keskin kamayadi.

British Journal of Sports Medicine nashrida chop etilgan ushbu ilmiy ish Buyuk Britaniyadagi 85 ming nafar insonning hayot tarzi va salomatligi ustidan 6 yil davomida kuzatuv olib borish orqali olingan ishonchli ma’lumotlarga asoslangan. Olimlar fitnes-trekerlar yordamida ishtirokchilarning jismoniy faolligini aniq o‘lchashga erishgan – bu esa avvalgi tadqiqotlardan farqli o‘laroq natijalarni yanada aniq va ilmiy ishonchli qilishga xizmat qilgan.

Qo‘lga kiritilgan ma’lumotlar shuni ko‘rsatdiki, kundalik piyoda yurish qadamlari saraton rivojlanish xavfiga bevosita ta’sir ko‘rsatadi. Masalan, kuniga 5 ming qadam yurganlarda muayyan turdagi saraton kasalliklariga chalinish ehtimoli sezilarli darajada kamroq bo‘lgan. Kuniga 7 ming qadam bosib o‘tganlarda bu xavf 11 foizga, 9 ming qadam yurganlarda esa 16 foizgacha pasaygani qayd etilgan. Shu bilan birga, 10 ming qadamdan ko‘proq yurgan kishilarda natija yanada yaxshilanmagan – ya’ni xavf kamayishi bir nuqtada to‘xtab qolgan.

Tadqiqotning yana bir muhim jihati – yurish tezligi ahamiyatsiz ekanligi. Ya’ni, tez yoki sekin yurishning farqi deyarli kuzatilmagan. Eng asosiysi – muntazam ravishda yurish. Olimlar jigar, endometriy (bachadon ichki qavati), o‘pka, siydik pufagi, miya, bo‘yin va hatto oshqozon saratonlariga chalinish xavfi muntazam yurish tufayli pasayishi mumkinligini ta’kidlashmoqda.

Oksford tadqiqotchilari so‘nggi xulosalarda odamlar har kuni hatto 30–40 daqiqalik piyoda yurish bilan ham o‘z sog‘lig‘i uchun katta ehtimolda saratondan himoya yaratishi mumkinligini ta’kidlashgan.

Zamin.uz tahririyati salomatlik va turmush tarziga oid ilmiy asoslangan tavsiyalarni sizga yetkazishda davom etadi. Siz kun davomida necha qadam yurasiz? Saratonga qarshi profilaktika uchun qanchalik jismoniy faollikni hayotingizga kiritgansiz? “Zamin”ni Telegramʻda oʻqing!