Калифорния университети олимларининг илмий изланиш натижалари кўра, тунги уйқу вақтининг кунига олти соатгача камайиши инсонда ўткир респиратор вирусли инфекцияларни (ЎРВИ) юқтириш эҳтимолини кескин оширади. Аниқроғи, бу хавф 4,2 баравар юқори экан! Ушбу жиддий хулосалар Brain, Behavior and Immunity (BBI) нуфузли журналида эълон қилинди.
Тадқиқот: Нималарга эътибор берилди?
Лойиҳага 164 нафар ихтиёрий қатнашчилар жалб қилинди ва мутахассислар уларнинг соғлиғини икки ой давомида доимий мониторинг қилди. Тиббий кўриклардан ташқари, иштирокчиларнинг турмуш тарзи (стресс даражаси, зарарли одатлар, спиртли ичимликлар истеъмоли) ҳақида чуқур маълумотлар йиғилди. Бироқ, тадқиқотчилар уйқу кўрсаткичларига устувор аҳамият берди — унинг давомийлиги, мунтазамлиги ва шахсий баҳоси қайд этилди.
Ҳимоянинг асосий омили
Тўпланган маълумотларнинг синчков таҳлили шуни кўрсатдики, айнан уйқунинг давомийлиги индекси шамоллаш билан боғлиқ вирусларни юқтириш хавфининг асосий башорат қилувчи омили бўлиб чиқди.
Суткасига атиги олти соат ухлаган ихтиёрий қатнашчиларда касалликка чалиниш имконияти, камида етти соат дам олганларга нисбатан, 4,2 баравар юқори бўлди.
Бундан ташқари, тунги уйқунинг беш соатгача қисқариши эса бу хавфни 4,5 баробаргача кўпайтирган.
Тадқиқотнинг ажралиб турувчи хусусияти шундаки, ёш, ижтимоий-иқтисодий шароитлар ва ҳар хил зарарли одатлар каби омиллар инфекцияга берилувчанликка деярли таъсир кўрсатмаган. Хулоса шуки, иммунитет тизимининг кучи асосан тананинг тўлиқ дам олишига боғлиқ бўлиб қолмоқда. Соғлом бўлиш учун ҳар бир инсон ўзининг 7 соатлик тинч уйқусини кафолатлаши керак.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
