ФИФА 2026 йилдаги Жаҳон чемпионати қуръа ташлаш маросими бўйича дастлабки маълумотларни эълон қилди. Унга кўра, Ўзбекистон миллий терма жамоаси мураккаб ва ўта масъулиятли саналган 3-саватдан ўрин олди. Бу — ўзбек футболи учун тарихий босқич ва катта мусобақага тайёргарликда муҳим белги сифатида баҳоланмоқда.
ФИФА мамлакатларни қуйидаги саватларга тақсимлади:
1-сават — дунёнинг етакчи гранд жамоалари:
Канада, Мексика, АҚШ (мезбонлар), Испания, Аргентина, Франция, Англия, Бразилия, Португалия, Нидерландия, Белгия, Германия.
2-сават — юқори рақобатли кучли термалар:
Хорватия, Марокаш, Колумбия, Уругвай, Швейцария, Япония, Сенегал, Эрон, Жанубий Корея, Эквадор, Австрия, Австралия.
3-сават — Ўзбекистон жой олган босқич:
Норвегия, Панама, Миср, Жазоир, Шотландия, Парагвай, Тунис, Кот-д’Ивуар, Ўзбекистон, Қатар, Саудия Арабистони, Жанубий Африка.
4-сават — плей-офф ғолиблари ва қитъалараро баҳслар:
Иордания, Кабо-Верде, Гана, Кюрасао, Ҳаити, Янги Зеландия, Европа плей-оффи ғолиблари (A, B, C, D), 2 та қитъалараро плей-офф ғолиблари.
Ўзбекистон 3-саватда — демак, қатор рақиблардан ҳозироқ халос!
Қуръа қоидасига кўра, ҳар бир гуруҳ 4 жамоадан ташкил топади ва ҳар бир саватдан биттадан жамоа тушади. Шу боис, Ўзбекистон 3-саватдан жой олган термаларга қарши гуруҳ босқичида рақиб бўлмайди.
Яъни, Норвегия, Миср, ЖАР, Шотландия, Кот-д’Ивуар, Тунис, Қатар ва бошқа бир қатор термалар бизга гуруҳда тўғри келмайди.
Шунингдек, битта конфедерация жамоалари бир гуруҳда тушмаслиги қоидаси сақланади — Европа бу истисно, чунки УЕФАдан жамоалар сони жуда кўп.
Плей-оффга чиқиш тартиби — янги тизим, янги имконият
ЖЧ-2026да илк бор 48 та жамоа иштирок этади ва 12 та гуруҳдан иборат формат жорий этилади.
Плей-оффга қуйидагилар йўл олади:
ҳар бир гуруҳда 1- ва 2-ўрин эгалари,
шунингдек, 3-ўринда қайд этилган жамоаларнинг энг яхши 8 таси.
Бу Ўзбекистон учун имкониятлар янада катта эканини кўрсатади.
Қуръа маросими — тарихий кеча бўлиш кутиляпти
Тантанали маросим 5 декабрь куни АҚШ пойтахти Вашингтондаги “The Kennedy Center” мажмуасида ўтказилади. Унда:
ЎФА раҳбарлари,
терма жамоа бош мураббийи Фабио Каннаваро,
миллий жамоа мутахассислари,
ФИФАнинг махсус таклифи билан ўзбек футболи афсонаси Миржалол Қосимов иштирок этади.
Жаҳон чемпионати – 2026: тарихий мусобақа
Мусобақа 2026 йил 11 июн – 19 июл кунлари АҚШ, Канада ва Мексикада ўтказилади.
Ўзбекистонда эса юртдошларимиз қуръани ҳам, гуруҳ босқичини ҳам юқори қизиқиш билан кутиб турибди.
Миллий жамоанинг 3-саватдан ўрин олиши — катта босқич, янги тарих ва катта имкониятлар эшигидир.
“Zamin”ни Telegram'да ўқинг!
