Annalena Berbok: Putin Ukraina masalasini Sholts bilan muhokama qilishdan bosh tortdi

^{Foto: Hannibal Hanschke/AFP/Getty Images}
Rossiya prezidenti Vladimir Putin Germaniya kantsleri Olaf Sholts bilan Ukraina boʻyicha vositachilikni muhokama qilishga tayyor emas, dedi Germaniya tashqi ishlar vaziri Annalena Berbok. Oʻz navbatida, «Ukraina adolatli tinchlik oʻrnatishga tayyor», dedi u 11 oktyabr, juma kuni Ukraina prezidenti Volodimir Zelenskiyning Berlinga tashrifi oldidan.

Slovakiya tashqi ishlar vaziri Yuray Blanar bilan suhbatda u Putinning tinchlik muzokaralari tashabbusini rad etishdagi pozitsiyasini tanqid qildi. «U tinchlikni qabul qilishdan bosh tortyapti va har kuni urush va vayronagarchilik foydasiga yana bir signal yuboryapti», — deya qoʻshimcha qildi u.

Peskov: Berlin hozircha Moskva bilan muloqot boʻyicha aloqaga chiqmadi

Germaniya tomoni hozircha kantsler Olaf Sholts va Rossiya prezidenti Vladimir Putin oʻrtasida telefon orqali suhbat oʻtkazishni soʻramagan. Bu haqda 2 oktyabr kuni boʻlib oʻtgan brifingda Rossiya etakchisining matbuot kotibi Dmitriy Peskov Berlindan suhbat boʻyicha soʻrovlar bor-yoʻqligi haqidagi savolga javob berar ekan aytib oʻtdi.

Die Zeit: Sholts Putinga qoʻngʻiroq qilmoqchi

Germaniya kantsleri Olaf Sholts Rossiya prezidenti Vladimir Putin bilan telefon orqali muloqot qilish imkoniyatini koʻrib chiqmoqda. Bu haqda 1 oktyabr kuni Die Zeit gazetasi Germaniya hukumatidagi nomi oshkor etilmagan manbalariga tayanib xabar berdi. Bu suhbat noyabr oyida Braziliyada boʻlib oʻtadigan G20 sammiti arafasida oʻtkazilishi rejalashtirilgan, biroq Berlin hozircha Moskvaga rasmiy soʻrov bilan chiqqani yoʻq, deb yozadi nashr.

Agar suhbat boʻlib oʻtsa, Sholts Ukrainani qoʻllab-quvvatlovchi davlatlar rahbarlaridan birinchi boʻlib Putin bilan toʻgʻridan toʻgʻri aloqani tiklaydi. Germaniya kantsleri va Rossiya prezidenti oʻrtasidagi soʻnggi telefon muloqoti 2022 yil dekabrida boʻlib oʻtgan. AQSh prezidenti Jo Bayden, Frantsiya prezidenti Emmanuel Makron va Britaniyaning sobiq bosh vaziri Boris Jonson ham Putin bilan oxirgi marta 2022 yilda toʻgʻridan toʻgʻri gaplashgan. “Zamin” yangiliklarini “Telegram”da kuzatib boring