Putin va Zelenskiy uchrashuvi faqat bir shart bilan amalga oshishi mumkin

Rossiya va Ukraina o‘rtasidagi qurolli to‘qnashuvga barham berish masalasi bo‘yicha yuzma-yuz muzokaralar ehtimoli yana kun tartibiga chiqmoqda. Kreml matbuot kotibi Dmitriy Peskov 20 may kuni bergan bayonotida Rossiya prezidenti Vladimir Putin va Ukraina rahbari Vladimir Zelenskiy o‘rtasida uchrashuv faqatgina aniq kelishuvlar natijasi sifatida amalga oshishi mumkinligini bildirdi.

“Natija bo‘lmas ekan, uchrashuv ham bo‘lmaydi”

Peskovning ta’kidlashicha, ikki davlat delegatsiyalari oldindan muayyan kelishuvlarga erishgan taqdirdagina prezidentlar uchrashi mumkin:

“Biz bunday yuzma-yuz uchrashuvni muzokara jarayonida erishilgan natija sifatida ko‘rishimiz mumkin. Lekin gap faqat imzo va rasmiyat emas – Ukraina tomonidan kim va qanday mandat bilan bu hujjatni tasdiqlashi ham juda muhim.”

Moskvadan Istanbulga – jiddiylik sinovida

Rossiya 16 may kuni Istanbulda o‘tkazilgan ikki tomonlama uchrashuvda o‘z delegatsiyasiga prezident yordamchisi Vladimir Medinskiyni bosh qilib yubordi. Bu qadam Ukrainada jiddiy qabul qilinmadi. Zelenskiyning bayonotiga ko‘ra, agar Putinning o‘zi muzokaralarga kelmasa, bu Kremlning jarayonga jiddiy qaramayotganini anglatadi.

Shu bilan birga, Ukraina baribir muzokarada ishtirok etishni ma’qul deb topdi. The Economist nashri esa Istanbul muzokaralari davomida Rossiya tomoni bir qator tahdidlar bildirganini, xususan Xarkov va Sumi viloyatlarini egallab olish niyati haqida so‘z ketganini yozdi.

Putin 30 kunlik sulhni rad etdi

Rossiya rahbari ilgari Yevropa Ittifoqi davlatlari va Ukraina tomonidan taklif qilingan 30 kunlik o‘t ochish to‘xtatish taklifini qabul qilmagan. U Istanbul muzokaralar formatiga qaytishni taklif etgan, biroq u muzokaralarda shaxsan ishtirok etmagan.

Zamin.uz tahririyatidan:

Hozircha ikki yetakchi o‘rtasida uchrashuv bo‘lishi faqat bir shartga – delegatsiyalar darajasidagi aniq natijaga bog‘liq. Bu orada esa urush maydonlarida voqealar davom etmoqda. Siz Putin va Zelenskiy muzokarasi ro‘y bersa, tinchlik sari qadam tashlana oladi deb o‘ylaysizmi? “Zamin”ni Telegramʻda oʻqing!