AQSh prezidenti Donald Tramp Isroilga yetib keldi. Uning samolyoti Ben-Gurion xalqaro aeroportiga qo‘ndi va bu voqea G‘azo sektoridagi uzoq yillik ziddiyatni tugatish bo‘yicha boshlanayotgan yangi diplomatik jarayon bilan bir vaqtda ro‘y berdi.
Reuters agentligi yozganidek, Trampning tashrifi HAMAS va Isroil o‘rtasidagi kelishuv doirasida garovda bo‘lgan ilk yetti nafar shaxs ozod etilganidan so‘ng amalga oshdi. Bu voqea tinchlik muzokaralarining dastlabki natijasi sifatida baholanmoqda.
Ma’lumotlarga ko‘ra, Donald Tramp yaqin soatlarda Isroil parlamenti — Knessetda chiqish qilishi kutilmoqda. Uning nutqida tinchlik jarayoni, mintaqaviy xavfsizlik va HAMAS bilan munosabatlarni qayta ko‘rib chiqish masalalariga to‘xtalishi ehtimol qilinmoqda.
Shundan so‘ng, u Misrning Sharm-ash-Shayx shahriga yo‘l oladi. U yerda G‘azo bo‘yicha xalqaro sammit o‘tkazilishi, unda AQSh, Misr, Isroil va qator arab davlatlari vakillari ishtirok etishi rejalashtirilgan. Sammitning asosiy maqsadi — mojaroni siyosiy yo‘l bilan hal etish va barqaror tinchlik asoslarini belgilashdir.
Trampni aeroportda Isroil Bosh vaziri Binyamin Netanyaxu hamda uning rafiqasi, shuningdek, AQSh prezidentining maxsus vakili Stiv Uitkoff, maslahatchisi Jared Kushner va uning turmush o‘rtog‘i Ivanka Tramp tantanali ravishda kutib oldi.
Tahlilchilarning fikricha, Trampning bu tashrifi nafaqat G‘azo mojarosini bartaraf etish, balki Yaqin Sharqda yangi siyosiy muvozanat yaratish yo‘lidagi muhim qadam bo‘lishi mumkin. Tinchlik muzokaralari muvaffaqiyatli kechsa, bu tashrif tarixda yangi sahifa sifatida yodda qolishi aniq.
“Zamin”ni Telegramʻda oʻqing!
