Senegalda futbol bayrami butun mamlakat miqyosida davom etadi. Afrika Millatlar Kubogi finalida Marokash ustidan qozonilgan dramatik g‘alabadan (1:0) so‘ng Senegal prezidenti 19-yanvarni ish haqi saqlangan holda umummilliy dam olish kuni deb e’lon qildi.
Mamlakat rahbari Bassiru Diomay Fay senegal xalqiga murojaat qilib, tarixiy natija munosabati bilan 19 yanvarni haq to‘lanadigan dam olish kuni va davlat bayrami sifatida belgilashini ma’lum qildi. Uning ta’kidicha, bu qaror xalqning quvonchi, jamoaning mehnati va milliy g‘ururni keng nishonlash uchun qabul qilingan.
Shu tariqa, bugun Senegalda millionlab fuqarolar ishga chiqmaydi. Qishloqlardan tortib yirik shaharlargacha — barcha hududlarda bayram kayfiyati hukm surishi, ko‘chalarda qo‘shiqlar, bayroqlar va jamoaviy tantanalar bilan terma jamoaning Afrika Kubogidagi ikkinchi chempionligi nishonlanishi kutilmoqda.
Futbol ba’zan bir o‘yin bilan mamlakat kayfiyatini o‘zgartirib yuboradi. Senegal uchun bu final shunchaki kubok emas — bu millat birlashgan, ishongan va oxirida o‘z quvonchini butun dunyoga ko‘rsatgan kun bo‘ldi. Endi esa g‘alabaning zavqi — maydondagina emas, butun mamlakatda davom etadi.
“Zamin”ni Telegramʻda oʻqing!
