Qorin bo‘shlig‘i churrasi nima? Uning turlari qanday? Sabablarichi?

Qorin bo‘shlig‘i churrasi nima? Uning turlari qanday? Sabablarichi? Buni oldini olish uchun nimalarga e’tibor berish kerak?

Bu haqda Milliy tibbiyot markazi jarrohi Ahror Xudoyqulovning ma’lumotlari bilan quyida tanishishingiz mumkin:

Qorin bo‘shlig‘i churrasi (abdominal churra) — ichki a’zolar yoki yog‘ to‘qimalarining qorin devorida hosil bo‘lgan teshik yoki zaiflashgan joy orqali tashqariga chiqishidir. Bu kasallik qorin devorining ma’lum bir qismida kuchlanish yoki bosim ortishi natijasida yuzaga keladi.

Qorin bo‘shlig‘i churrasi turlari:
1. Tashqi churra: Qorin devoridagi mushaklarning zaiflashishi yoki teshilishi orqali yuzaga keladi.
2. Ichki churra: Ichki organlarning qorin bo‘shlig‘i ichida noto‘g‘ri joylashishi bilan tavsiflanadi.

Sabablari:
- Genetik moyillik.
- Jismoniy og‘ir yuk ko‘tarish.
- Qorin bo‘shlig‘idagi bosimning ko‘tarilishi (masalan, surunkali yo‘tal, qabziyat, homiladorlik).
- Operatsiya yoki jarohat natijasida qorin devorining zaiflashishi.
- Ortiqcha vazn yoki semizlik.

Belgilari:
- Qorin sohasida shish yoki bo‘rtib chiqish (ayniqsa, turganda yoki kuchlangan paytda)
- Noqulaylik yoki og‘riq (ko‘pincha jismoniy faoliyat bilan kuchayadi).
- Ba’zan ichak faoliyatining buzilishi (ich kelmaslik, qusish).

Davolash usullari:
Qorin bo‘shlig‘i churrasini davolash asosan jarrohlik yo‘li bilan amalga oshiriladi. Muhim turlari quyidagicha:

1. Ochik jarrohlik usuli: Katta churralar uchun ishlatiladi, churra joyi tikiladi va maxsus to‘r (mesh) o‘rnatiladi.
2. Laparoskopik usul: Kichik ketsiklar orqali churra bartaraf qilinadi. Bu usul kamroq invaziv bo‘lib, tiklanish davri qisqaroq.

Oldini olish:
✔️Og‘ir yuklarni ko‘targanda ehtiyot bo‘lish.
✔️Qorin mushaklarini mustahkamlovchi mashqlar bajarish.
✔️Ortiqcha vazndan qochish.
✔️Qabziyat va yo‘talni vaqtida davolash.

Agar churra vaqtida davolanmasa, u bo‘g‘ilish (strangulyatsiya) xavfini keltirib chiqarishi mumkin. Bu holat favqulodda jarrohlik aralashuvini talab qiladi. Shu sababli churra belgilarini sezgan zahoti shifokorga murojaat qilish tavsiya etiladiQorin bo‘shlig‘i churrasini laparoskopik usulda olib tashlash (laparoskopik herniorafiya) bugungi kunda eng samarali va kam jarohatli jarrohlik usullaridan biridir. Ushbu operatsiyada kichik ketsiklar orqali maxsus asbob-uskunalar yordamida churra teshigi yopiladi va maxsus sintetik to‘r o‘rnatilishi mumkin.

Operatsiyadan keyin e’tibor berish kerak bo‘lgan holatlar:

1. Og‘riqni boshqarish: Operatsiyadan keyin yengil noqulaylik va og‘riq bo‘lishi tabiiy. Shifokor buyurgan og‘riq qoldiruvchi dorilarni qabul qilish kerak.
2. Yaralarni parvarish qilish: Kesik joylarini toza va quruq saqlash muhim. Infeksiya alomatlari (qizarish, shishish yoki yiring) kuzatilsa, darhol shifokorga murojaat qilish lozim.
3. Harakatlanish: Operatsiyadan keyin bir necha kun ichida yengil yurish tavsiya etiladi. Og‘ir jismoniy yuklamalardan uzoqroq bo‘lish kerak (taxminan 4-6 hafta).
4. Ovqatlanish: Operatsiyadan so‘ng hazm qilishni yengillashtirish uchun yengil ovqatlar iste’mol qilish tavsiya etiladi. Gaz hosil qiladigan yoki qattiq ovqatlardan vaqtinchalik cheklanish kerak.
5. Shifokor nazorati: Reabilitatsiya jarayonini kuzatish uchun shifokor ko‘rigiga o‘z vaqtida borish lozim. “Zamin” yangiliklarini “Facebook”da kuzatib boring