Turkiya Superligasi 12-turidan o‘rin olgan bahsda “Istanbul Bashakshehir” safarda “Genchlerbirligi” jamoasiga qarshi maydonga tushdi. Bellashuv anchagina keskin va kurashlarga boy tarzda o‘tdi, ammo yakunda Eldor Shomurodovning goli mehmonlarga ochko olib berish uchun yetarli bo‘lmadi.
Birinchi bo‘limda maydon egalari faol harakat boshlab, 35-daqiqada Kelvenning aniq zarbasi orqali hisobni ochishdi. “Bashakshehir” javob qaytarish uchun bir necha bor xavfli hujumlar uyushtirdi, ammo ustunlikni golga aylantira olmadi.
Ikkinchi taym boshlanishi bilanoq o‘zbek muxlislari intizor bo‘lgan holat ro‘y berdi — Eldor Shomurodov raqib darvozasiga gol urdi va hisobni 1:1 ko‘rinishiga qaytardi. Uning goli nafaqat jamoaga umid, balki shaxsan o‘zining to‘purarlik poygasidagi yetakchiligini mustahkamlab qo‘ydi.
Biroq “Bashakshehir”ning quvonchi uzoqqa cho‘zilmadi. Oradan atigi 7 daqiqa o‘tib, Mbay Nyang 11 metrlik jarima zarbasidan aniq foydalanib, jamoasini yana oldinga olib chiqdi — 2:1. Qolgan vaqtda mehmonlar hisobni tenglashtirish uchun bir necha bor imkoniyat yaratdi, lekin “Genchlerbirligi” darvozabonining ishonchli o‘yini va himoyadagi qat’iyatli harakatlar natijani saqlab qoldi.
Genchlerbirligi — Bashakshehir 2:1
7 noyabr. Anqara. «Eryaman»
Gollar: Kelven (35), Nyang (51, penalti) — Shomurodov (46).
Genchlerbirligi — Velyu, Kelven, Gutas, Zuzek, Pereyra, Dele-Bashir-u, Ulgun (Mimaro‘g‘li, 76), Gurpuz (Demir, 76), Koyta (Onur, 67), Tonguya (Onekuru, 90+5), Nyang (Osmano‘g‘li, 90+5).
Bashakshehir — Shengezer, Bulut, Duarte, Opoku, Shahiner (Kemen, 68), O‘zdemir (Harit, 58), Gunesh, Sari (Turuch, 77), Krespo (Zelke, 68), da Koshta (Kalujinski, 58), Shomurodov.
Ogohlantirishlar: Opoku (49), Kalujinski (72), Onur (84), Pereyra (88), Duarte (88).
Shu tariqa, “Bashakshehir” yana ochko yo‘qotdi va 12 ta uchrashuvdan so‘ng 13 ochko bilan turnir jadvalida 10-o‘rinda qolmoqda. Jamoa so‘nggi paytlarda barqaror natija ko‘rsata olmayotgan bo‘lsa-da, Eldor Shomurodovning gollari uning jamoasi uchun asosiy umid manbai bo‘lib turibdi.
Ma’lumot uchun, Shomurodov bugungi uchrashuvdagi goli bilan Superliga to‘purarlar ro‘yxatida peshqadamligini yanada mustahkamladi — u joriy mavsumda 8 ta gol urgan holda eng samarali hujumchilardan biri bo‘lib qolmoqda.
“Bashakshehir”ning navbatdagi bahsi 24-noyabr kuni kuchli raqib — “Trabzonspor”ga qarshi bo‘ladi. Muxlislar Shomurodovdan yana gol va jamoasidan muvaffaqiyat kutmoqda.
“Zamin”ni Telegramʻda oʻqing!
