Sog‘liqni saqlash vazirligi ijtimoiy tarmoqlarda tarqalgan, bolalar orasida qayt qilish va ich ketish belgilari bilan kechayotgan virusli kasallik haqidagi xabarlarga rasmiy izoh berdi. Rasmiy ma’lumotda ta’kidlanishicha, bu holatlar xavotirga asos bermaydi va kuz faslida ko‘p uchraydigan odatiy o‘tkir respirator virusli infeksiyalar (O‘RVI) bilan bog‘liq.
Vazirlik ma’lumotiga ko‘ra, har yili kuz va qish mavsumlarida havo harorati pasayishi sababli virusli kasalliklar soni tabiiy ravishda ko‘payishi kuzatiladi. Bu infeksiyalar turli ko‘rinishda kechishi mumkin: ayrim bolalarda yo‘tal, isitma va burun bitishi bo‘lsa, boshqalarida oshqozon-ichak tizimidagi buzilishlar — ya’ni qayt qilish yoki ich ketish belgilarini keltirib chiqaradi.
Mutaxassislar bu holat virus shtammlarining xilma-xilligi bilan bog‘liq ekanini ta’kidlashmoqda. Har mavsumda virus turlari biologik jihatdan farq qiladi va ular inson organizmiga turlicha ta’sir ko‘rsatadi.
Sog‘liqni saqlash vazirligi shunga e’tibor qaratdiki, bu holatlarni koronavirus mutatsiyasi bilan bog‘lash noto‘g‘ri va ilmiy asosga ega emas. “Bugungi kunda COVID-19 o‘zining og‘ir shaklini yo‘qotgan va oddiy respirator infeksiya darajasiga aylangan. Mamlakatimizda epidemiologik vaziyat to‘liq barqaror”, — deyiladi bayonotda.
Vazirlik qo‘shimcha qilishicha, O‘zbekiston bo‘ylab tibbiyot muassasalarida o‘tkir respirator virusli kasalliklarni davolash uchun yetarli miqdorda o‘rin-joy, dori-darmon va zarur uskunalar zaxirasi mavjud. Shuningdek, epidemiologik vaziyat doimiy ravishda monitoring qilinib, tezkor nazorat ostida saqlanmoqda.
Mutasaddilar aholidan ortiqcha xavotirga tushmaslikni so‘rab, ayni vaqtda bolalarda shunday belgilar kuzatilganda o‘z vaqtida shifokorga murojaat qilishni tavsiya etdi. “Ota-onalar farzandlarida qayt qilish, isitma yoki boshqa infeksiya belgilari sezsa, o‘zi bilan emas, oilaviy shifokor ko‘rigiga murojaat qilsin. O‘zboshimchalik bilan dori qabul qilish yoki uy sharoitida davolash xavfli bo‘lishi mumkin”, — deyiladi rasmiy ma’lumotda.
Shu bilan birga, SSV aholini sog‘lom turmush tarziga amal qilish, qo‘l gigiyenasiga rioya etish, jamoat joylarida niqob taqish va organizmni viruslarga qarshi mustahkamlash uchun vitaminli ovqatlar iste’mol qilishga chaqirdi.
Xulosa qilib aytish mumkinki, O‘zbekistondagi epidemiologik holat barqaror bo‘lib, hech qanday favqulodda xavf yo‘q. Kuz mavsumida kuzatilayotgan bu virusli holatlar tabiiy jarayon bo‘lib, tibbiyot tizimi bu borada to‘liq tayyor holatda ekanligi ta’kidlandi.
Shu tariqa, Sog‘liqni saqlash vazirligi tarqalgan xabarlarga oydinlik kiritdi va aholini vaziyatni to‘g‘ri baholashga, ortiqcha shov-shuvga berilmaslikka hamda tibbiy tavsiyalarga amal qilishga chaqirdi.
“Zamin”ni Telegramʻda oʻqing!
