Ўзбекистон Бирлашган Араб Амирликларига чорвачилик маҳсулотлари экспортини йўлга қўймоқда. Эндиликда мамлакатимиздан БАА бозорига инкубацион тухум, бир кунлик жўжалар, истеъмол тухуми, парранда гўшти ҳамда қуён гўшти етказиб бериш имконияти пайдо бўлади.
Маълум қилинишича, Бирлашган Араб Амирликларининг Иқлим ўзгариши ва атроф-муҳит вазирлиги ушбу маҳсулотлар бўйича беш турдаги ветеринария-санитария сертификати намуналари икки томонлама келишиб олинганини тасдиқлади. Бу эса Ўзбекистон маҳсулотларининг БАА бозорига расмий кириб бориши учун муҳим ҳуқуқий ва техник асос яратади.
Келишув икки давлат ўртасида қишлоқ хўжалиги ва чорвачилик соҳасидаги савдо алоқаларини кенгайтиришга хизмат қилади. Айниқса, паррандачилик ва гўшт маҳсулотлари экспорти учун янги бозор очилиши маҳаллий ишлаб чиқарувчиларга қўшимча имконият беради.
Ветеринария-санитария сертификати экспорт қилинаётган маҳсулотнинг импорт қилувчи давлат талабларига мувофиқлигини тасдиқлайди. Бундай ҳужжат маҳсулот сифати, хавфсизлиги ва санитария меъёрларига жавоб беришини кўрсатади.
Икки томонлама келишилган сертификат намуналарининг мавжудлиги товарларнинг БАА божхонасидан ўтиши учун мажбурий шарт ҳисобланади. Яъни бу ҳужжатларсиз маҳсулотни расмий тарзда ушбу бозорга киритиш имкони бўлмайди.
Ўзбекистон учун БАА бозорига чиқиш экспорт географиясини кенгайтириш, маҳаллий маҳсулотлар рақобатбардошлигини ошириш ва ишлаб чиқарувчилар учун янги даромад манбаларини яратиш нуқтаи назаридан муҳим қадамдир.
Бу келишув, шунингдек, икки давлат ўртасидаги ўзаро товар айланмасини оширишга ҳам хизмат қилади. Чорвачилик маҳсулотлари бўйича экспорт йўналишининг очилиши келгусида бошқа қишлоқ хўжалиги маҳсулотлари учун ҳам янги имкониятлар эшигини очиши мумкин.
Қисқаси, Ўзбекистон маҳсулотлари яна бир муҳим ташқи бозорга йўл олмоқда. Энди асосий вазифа — сифат, барқарор етказиб бериш ва халқаро талабларга мос ишлашни таъминлаш. БАА бозорига кириш осон эмас, лекин тўғри ишланса, имконият анча катта.
“Zamin”ни Telegram'да ўқинг!
