Зеленский: Россия урушни тугатишни истамаяпти

Украина президенти Володимир Зеленский яна бир бор Россияни урушни тугатишдан манфаатдор эмасликда айблади. Унинг таъкидлашича, Россия кучлари Украина шаҳарларига юзлаб ҳужумлар уюштирган ва бу урушни якунлаш нияти йўқлигининг ёрқин далилидир.

“Ушбу ҳафтада бизнинг шаҳарларимизга 1020 дан ортиқ ҳужумкор учувчисиз учоқлар, 1360 га яқин бошқариладиган ҳаво бомбалари ва 10 дан ортиқ ракеталар йўлланди. Урушни тугатишни истаганлар бундай қилмайди.” – деб ёзди Зеленский ижтимоий тармоқда.

Украина президенти халқаро ҳамжамиятни Россияга қарши биргаликда босим ўтказишга чақирди ва янги санкция чораларини кучайтириш зарурлигини таъкидлади.

“Украина, Европа, Америка ва бутун дунёда тинчликни истаган ҳар бир киши – биз биргаликда адолатли ва мустаҳкам тинчликни таъминлай оламиз.” – деди Зеленский.

Кремль тинчлик музокараларини атайлаб кечиктиряптими?

Бундан уч кун аввал Зеленский Россияни АҚШ ташаббуси билан таклиф қилинган тинчлик келишувини қасддан чўзишда айблади.

“Афсуски, Жиддадаги учрашувдан бери Россиядан ҳеч қандай мазмунли жавоб олмаяпмиз. Бу эса яна бир бор Россия урушни давом эттиришга интилаётганини тасдиқлайди.” – деди у 13 март куни.

Шунингдек, Зеленский АҚШ томонидан Россияга босим ўтказилиши урушни тугатиш учун етарли бўлишига умид билдирди.

Европа Иттифоқи Украинага қурол етказишда давом этади

Европа Иттифоқи ҳатто вақтинчалик оташкесим давомида ҳам Украинага қурол етказиб беришни тўхтатиш ниятида эмас.

14 март куни Брюсселда Европа Иттифоқи ташқи ишлар кенгаши йиғилиши бўлиб ўтди. Унда қатор дипломатлар Украина тинчлик музокараларига энг кучли позицияда киришишини таъминлаш учун Киевга ҳарбий ёрдам давом эттирилиши кераклигини билдиришди.

“Агар тажовузкор давлат (Россия) оташкесим талаб қилса, биз Киевга қурол етказиб беришни тўхтатамиз, деб ўйламайман.” – деди Брюсселдаги брифингда иштирок этган европалик дипломатлардан бири.

Яна бир дипломат, шунингдек, Украина музокаралар жараёнида ҳарбий жиҳатдан ҳеч қандай заифликка йўл қўймаслиги кераклигини таъкидлади.

Украина ва халқаро ҳамжамият Россияни урушни тўхтатишга мажбур қилиш учун босимни кучайтириш зарурлигини таъкидламоқда. Европа Иттифоқи эса Киевга ҳарбий ёрдамни давом эттиришни режалаштирмоқда. Кремл эса тинчлик музокараларига расмий жавоб қайтармагани сабабли, урушнинг тугаши борасида аниқ прогноз бериш қийин бўлиб қолмоқда. “Замин” янгиликларини “Telegram”да кузатиб боринг