Эрон ҳудудида жойлашган ва Осиёдаги энг катта шўр сув ҳавзаси ҳисобланган Урмия кўли бутунлай қуриб қолди. Мазкур ҳолат нафақат экологлар, балки жамоатчилик ва мухолифат ОАВлари орасида ҳам катта муҳокамаларга сабаб бўлмоқда.
Мутасаддиларнинг таъкидлашича, кўлнинг йўқолиши тўғридан-тўғри ҳукуматнинг сув сиёсати билан боғлиқ. Маълумотларга кўра, мамлакатда бир миллиондан зиёд ноқонуний қудуқлар қазилиб, ер ости сувлари кескин камайиб кетган. Шу билан бирга, қишлоқ хўжалиги соҳаси умумий сув ресурсларининг 88 фоизини сарфлаётган бўлса-да, иқтисодиётнинг ички маҳсулотида атиги 10 фоиз улушга эга.
Экологлар Урмия кўлининг қуриши оқибатида табиий муҳитда жиддий муаммолар юзага келганини таъкидлашмоқда. Хусусан, қурғоқчилик натижасида шамоллар кучайиб, деҳқончиликни амалга ошириш деярли мумкин бўлмай қолган. Бу эса минтақада озиқ-овқат хавфсизлиги ва аҳоли турмуш тарзи учун катта таҳдид яратади.
Кўлнинг йўқолиши нафақат экологик, балки ижтимоий-иқтисодий инқирозга ҳам олиб келиши мумкинлиги таъкидланмоқда.
«Замин»ни Telegram’да ўқинг!
