Украина делегацияси АҚШ ва Европа Иттифоқи вакиллари билан Майами шаҳрида ўтказилган музокараларни якунига етказди. Бу ҳақда Украина Миллий хавфсизлик ва мудофаа кенгаши раҳбари Рустам Умеров ўзининг Telegram саҳифасида маълум қилди. Энди эса ушбу майдонда АҚШ ва Россия ўртасидаги алоҳида музокаралар бўлиб ўтиши кутилмоқда.
Маълум қилинишича, учрашув жума куни, 19 декабрь санасида бўлиб ўтган. Украина делегациясига раҳбарлик қилган Умеров музокаралар тафсилотларига тўхталмаган бўлса-да, суҳбатларда Киевнинг европалик ҳамкорлари ҳам қатнашганини таъкидлади. Унинг сўзларига кўра, муҳокамалар натижалари бўйича Украина президенти Володимир Зеленский хабардор қилинган.
— АҚШда америкалик ва европалик шерикларимиз билан учрашувни якунладик. Кейинги қадамлар ва яқин вақтда қўшма ишни давом эттириш масаласида келишувга эришдик, — дея ёзди Умеров.
Қайд этилишича, мазкур мулоқотлар 23 ноябрь куни Женевада Украина ва АҚШ делегациялари ўртасида бўлиб ўтган учрашувда муҳокама қилинган ишланмалар давоми сифатида ташкил этилган. Ушбу ҳужжатлар “Трампнинг Украина бўйича режаси” деб аталувчи концепция асосида тайёрланган.
20–21 декабрь кунлари эса Майамига Россия делегацияси етиб келиши кутилмоқда. Унга Россия президентининг махсус вакили Кирилл Дмитриев бошчилик қилади. Режага кўра, у АҚШ президентининг махсус вакили Стив Уиткофф ҳамда Доналд Трампнинг куёви Жаред Кушнер билан музокаралар ўтказади.
Маълумотларга кўра, АҚШ томони Украинага Россия бошлаган уруш якунланган тақдирда муайян хавфсизлик кафолатларини таклиф қилмоқда. Бироқ энг баҳсли масалалардан бири — Россия томони ҳали тўлиқ назорат қилмаётган Донецк ва Луҳанск ҳудудларига оид талаблар бўлиб қолмоқда.
AFP агентлигининг ёзишича, мазкур масала Берлиндаги аввалги учрашувларда ҳам кўтарилган. Кремл эса бу талабларни очиқ тарзда илгари суриб, улар бажарилмаса, куч ишлатиш эҳтимолини ҳам истисно қилмаяпти. Россия президенти Владимир Путин 19 декабрь куни бўлиб ўтган навбатдаги “тўғридан тўғри линия”сида ҳам ушбу даъволарни яна бир бор тилга олди.
Украина эса ўз позициясида қатъий турибди. Зеленскийнинг таъкидлашича, Киев Донбасс ҳудудларини на де-факто, на де-юре Россияники деб тан олмайди. Унинг сўзларига кўра, АҚШ ҳозирча бу масалада муросали ечим излашга уринмоқда.
Майамидаги ушбу дипломатик фаоллик эса яқин кунларда халқаро сиёсий майдонда янги бурилишлар бўлиши мумкинлигидан дарак бермоқда.
Меҳмон гуруҳидаги фойдаланувчилар ушбу мақолага изоҳ қолдира олмайди.
