Ўзбекистон халқининг севимли санъаткорларидан бири Тоҳир Содиқов “Меҳнат шуҳрати” ордени билан тақдирланди. Ушбу юксак эътироф санъаткорнинг кўп йиллик ижодий фаолияти ва миллий санъат ривожига қўшган ҳиссасининг муносиб баҳоси сифатида қаралмоқда.
Мукофот ҳақида сўз юритган Тоҳир Содиқов санъаткорларни рағбатлантириш уларга янги куч ва илҳом бағишлашини таъкидлади. Унинг фикрича, бундай эътибор ижодкорларни янада катта марралар сари ундайди.
“Санъаткорларни шунақа рағбатлантириш санъаткорга қанот бағишлайди, овозига овоз қўшилади, ижодига ижод қўшилади. Камтарона ижодимизни юксак баҳолашгани учун муҳтарам Президентимизга каттакон раҳмат”, — деди хонанда.
Тоҳир Содиқов 37 йилдан буён ижод билан шуғулланиб келаётганини эслаб ўтди. Санъаткорнинг айтишича, у ва жамоаси ижодий фаолиятни давом эттиради ҳамда мухлисларини янги лойиҳалар билан хурсанд қилишда давом этади.
“Zamin”ни Telegram'да ўқинг!
