Boltiqboʻyi davlatlari Rossiyaga bogʻliqlikdan butunlay xalos boʻldi

Boltiqboʻyi davlatlari – Latviya, Estoniya va Litva, uzoq yillik intizorlikdan soʻng, Evropa elektr tarmogʻi bilan toʻliq integratsiyaga erishdi. Ushbu tarixiy qadam Litva-Polsha yoʻnalishi orqali amalga oshirilib, Boltiqboʻyi mamlakatlari Evropa energetika tizimiga toʻlaqonli ulandi. Vilnyus shahrida tashkil etilgan marosimda Latviya, Litva va Estoniya rahbarlari, shuningdek, Evropa Komissiyasi raisi Ursula fon der Lyayen va Polsha prezidenti Anjey Duda ishtirok etdi.

Energetika sohasidagi bu ulkan oʻzgarish Boltiqboʻyi davlatlarining Rossiyaga bogʻliqlikdan butunlay xalos boʻlganini anglatadi. Bir vaqtlar Sovet Ittifoqi tarkibida boʻlgan ushbu mamlakatlar uchun Moskva bilan bogʻliq soʻnggi texnik bogʻliqlik uzildi. Bundan buyon ular elektr ta'minoti boʻyicha Rossiya va Belarusga emas, balki Evropaning yagona energetika bozoriga suyanadi.

Geosiyosiy ahamiyat va ramziy ma'no

Ushbu oʻzgarish nafaqat Boltiqboʻyi davlatlari, balki butun Evropa uchun ham katta geosiyosiy ahamiyat kasb etadi. Tadbirda nutq soʻzlagan Evrokomissiya rahbari Ursula fon der Lyayen bu jarayonni ozodlikka qoʻyilgan muhim qadam sifatida baholab, “Nihoyat, tahdid va shantajdan xalos boʻldik”, – deya ta'kidladi.

Shanba kuni Boltiqboʻyi mamlakatlari Rossiya, Belarus hamda Rossiyaning Kaliningrad viloyati bilan bogʻlab turgan barcha elektr tarmoqlarini ketma-ket uzdi. Bu esa endi ushbu davlatlar oʻz energetika mustaqilligiga ega ekanligini anglatadi.

Rossiya bilan munosabatlar va yangi yoʻl

Boltiqboʻyi davlatlari 1990 yilda Sovet Ittifoqidan mustaqilligini e'lon qilganidan buyon Moskva bilan ancha murakkab munosabatlarda boʻlgan. Xususan, 2022 yilda Rossiyaning Ukrainaga bostirib kirishi natijasida ushbu munosabatlar yanada taranglashdi. Estoniya, Latviya va Litva nafaqat energetika, balki boshqa strategik sohalarda ham Rossiya bilan bogʻliqlikni uzish yoʻlida faol harakat qilmoqda.

Endilikda Boltiqboʻyi davlatlari oʻz energiya manbalarini diversifikatsiya qilish va Evropa bilan hamkorlikni yanada kuchaytirishga e'tibor qaratadi. Bu jarayon nafaqat energetika xavfsizligini ta'minlaydi, balki iqtisodiy va siyosiy jihatdan ham yangi imkoniyatlar eshigini ochadi. “Zamin” yangiliklarini “Telegram”da kuzatib boring