Turkmanistonda milliy ot kuni keng nishonlandi: Prezidentga mamlakatning eng zotdor otlari taqdim etildi

Turkmanistonda davlat darajasida an’anaviy bo‘lib qolgan Turkman milliy oti kuni katta shodiyona va tantanalar bilan nishonlandi. Ushbu muhim bayram munosabati bilan mamlakatning turli hududlaridan prezident Sardor Berdimuhammedovga eng sara va zotdor otlar sovg‘a sifatida taqdim etildi. Turkmenportal nashrining ma’lum qilishicha, hatto viloyatlar huquq-tartibot idoralari rahbarlari ham prezidentga zotdor yilqilardan yuborgan.

Prezident Sardor Berdimuhammedov esa Arqadag‘ shahri yilqichilari tomonidan sovg‘a qilingan Parahat nomli otga shaxsan to‘qim taqib, bu bayramni yanada ahamiyatli qildi.

Nashr ta’kidlaganidek, bu yil Turkmaniston o‘z betarafligining 30 yilligini nishonlamoqda va milliy ot kuni mamlakat uchun g‘oyat muhim ahamiyatga ega. Shu munosabat bilan Turkmaniston davlat badiiy akademiyasida katta ko‘rgazma ham ochildi, unda mamlakatning mashhur otlari namoyish etildi.

Prezident Sardor Berdimuhammedov bayram munosabati bilan bir qator tabriklarni qabul qildi. Xususan, Tatariston rahbari ham Turkmaniston prezidentiga o‘zining samimiy tabrigini yo‘llagan.

Davlat rahbari kun davomida qator tadbirlarda ishtirok etdi. Prezidentga mazkur bayram tadbirlarida Turkmaniston hukumatining yuqori lavozimli a’zolari, diplomatik korpus vakillari hamda xalqaro tashkilotlarning rasmiylari hamrohlik qilishdi.

Bu bayram nafaqat Turkmaniston xalqi, balki butun mintaqa uchun madaniy va an’anaviy ahamiyat kasb etuvchi muhim voqelikka aylandi. “Zamin”ni Telegramʻda oʻqing!