Qozog‘iston prezidenti Qosim Jo‘mart-To‘qayev mahalliy «Turkistan» gazetasiga bergan intervyusida jamoatchilik orasida tarqalgan turli gap-so‘zlarga, xususan, o‘zining salomatligi haqidagi mish-mishlarga munosabat bildirdi. Davlat rahbari suhbat davomida o‘zini yaxshi his qilayotganini ochiq aytdi va sog‘lig‘idan hech qanday shikoyati yo‘qligini ta’kidladi.
Prezidentning so‘zlariga ko‘ra, uning ahvoli barqaror: qon bosimi doimiy tarzda me’yorda. To‘qayev kundalik tartibida jismoniy faollik borligini ham yashirmadi. U har kuni yoga bilan shug‘ullanishini, biroq bu mashg‘ulotlar meditatsiyasiz o‘tishini alohida qayd etdi.
«Salomatligim joyida, qon bosimim doimiy ravishda me’yorda. Har kuni yoga bilan shug‘ullanaman, lekin meditatsiyasiz», – dedi Qosim Jo‘mart-To‘qayev.
Shu bilan birga, Qozog‘iston yetakchisi haftasiga ikki marta sobiq professional sportchi bilan stol tennisi o‘ynashini ma’lum qildi. Uning fikricha, muntazam harakat va sport ruhiy holatni ham, umumiy tetiklikni ham ushlab turishda juda muhim.
To‘qayev so‘nggi vaqtlarda 9 kilogramm vazn tashlaganini ham ta’kidlab o‘tdi. Prezident bu o‘zgarish uning kundalik kayfiyatiga va jismoniy yengilligiga ijobiy ta’sir qilganini aytdi.
«Haqiqatan ham ozdim, bu o‘zimni ancha yengil va yaxshi his qilishimga yordam berdi», – deya qo‘shimcha qildi u.
Suhbat davomida davlat rahbari MDH mamlakatlari yetakchilarining jismoniy tayyorgarligi mavzusiga ham to‘xtalib o‘tdi. Uning aytishicha, mintaqadagi ko‘plab rahbarlar yaxshi jismoniy formada ekani sezilib turadi.
To‘qayev misol sifatida yaqinda Bishkekda o‘tgan norasmiy tadbirni esladi: u yerda Vladimir Putin yosh dzyudochiga qarshi kurashib, katta avlod sha’nini “himoya qilgani” haqida hazilomuz ruhda gapirdi.
Shuningdek, prezident boshqa rahbarlarning ham sportga munosabatini sanab o‘tdi:
- Ozarbayjon prezidenti Ilhom Aliyev muntazam ravishda mashq qiladi;
- Qirg‘iziston rahbari Sadir Japarov futbol o‘ynaydi;
- O‘zbekiston prezidenti Shavkat Mirziyoyev sport zalida shug‘ullanadi;
- Armaniston bosh vaziri Nikol Pashinyan velosipedda yurishni xush ko‘radi;
- Belarus rahbari Aleksandr Lukashenko hali ham xokkey o‘ynaydi;
- Tojikiston prezidenti Emomali Rahmon esa o‘zini yaxshi his qilayotganini aytgan.
Yakunda Qosim Jo‘mart-To‘qayev umumiy xulosani ham ochiq berdi: mintaqadagi hamkasblarining aksariyati ajoyib jismoniy holatda, deb aytish mumkin.
“Zamin”ni Telegramʻda oʻqing!
