Afrika Millatlari Kubogi sovrini Senegal bo‘ylab safarini davom ettiryapti — va bu sayohat oddiy “parad” emas, haqiqiy syujetli turne bo‘lyapti. Kubokning navbatdagi manzili esa ko‘pchilik kutmagan joyga to‘g‘ri keldi: Dakar shahridagi mamlakatdagi eng yirik va eng gavjum jazo muassasasi — Rebeyss qamoqxonasi.
Tashrifdan maqsad, tashkilotchilar aytishicha, sovrinni “hamma uchun yaqin” qilish, milliy g‘urur va birdamlik hissini kengroq qatlamga yetkazish bo‘lgan. Shu sabab mahbuslar qit’adagi eng nufuzli sovrinni nafaqat ko‘z bilan ko‘rish, balki unga qo‘l tekkizish imkoniyatiga ham ega bo‘lishdi. Bu tashabbus Senegal futbol federatsiyasi ko‘magida amalga oshirilgani aytilmoqda.
Biroq bu qaror jamiyatda turli reaksiyalarga sabab bo‘ldi. Ijtimoiy tarmoqlarda Rebeyss qamoqxonasidan olingan video va suratlar tezda tarqaldi: kadrlarda kubok mahbuslarga yaqinlashtirilayotgani, ayrimlari esa panjara ortidan qo‘l cho‘zib, sovringa yetishga uringani aks etgan. Qisqasi, “trofey-tur” bu safar odamlarni hayratga soldi — kimdir buni insonparvar qadam deydi, kimdir esa “bu qayergacha bordi?” deb qabul qildi.
Eslatib o‘tamiz, yanvar oyida Senegal terma jamoasi finalda Marokashni 1:0 hisobida mag‘lub etib, Afrika Millatlari Kubogini qo‘lga kiritgan edi. Shu g‘alabadan keyin “Teranga sherlari”ga topshirilgan sovrin mamlakat bo‘ylab milliy iftixor ramzi sifatida turli hududlarga olib chiqilmoqda.
Bir narsa aniq: bu kubok Senegalda shunchaki trofey emas — u jamoani ham, jamiyatni ham birlashtirishga urinayotgan katta ramz. Faqat ramzni qayerda va qanday ko‘rsatish masalasi hamon bahs tug‘diryapti.
“Zamin”ni Telegramʻda oʻqing!
