O‘zbekistonda xizmat ko‘rsatgan artist, milliy sirk san’atining yirik namoyondalaridan biri Olimjon Toshkenboyev 81 yoshida olamdan o‘tdi. Bu haqda Madaniyat vazirligi rasmiy ma’lumot berdi.
Olimjon Toshkenboyev uzoq yillar davomida “O‘zbekiston dorbozlari” truppasiga rahbarlik qilib, milliy dorbozlik san’ati sohasida samarali faoliyat yuritdi.
Uning rahbarligi ostidagi “O‘zbekiston dorbozlari” guruhi ko‘plab xorijiy davlatlarda, jumladan Polsha, Germaniya, Misr, Belgiya, Niderlandiya, Shveysariya, Braziliya, Argentina, Kolumbiya va Ekvador kabi mamlakatlarda katta muvaffaqiyat bilan o‘z san’atini namoyish qildi.
Shu bilan birga, u “O‘zbeksirk” birlashmasida rejissyor lavozimida faoliyat yuritib, ko‘plab yosh shogirdlarni tarbiyalab, ularni san’atga tayyorladi.
Olimjon Toshkenboyevning o‘ziga xos usuli va rahbarligi milliy sirk san’ati rivojiga muhim hissa qo‘shdi va uning ilhom beruvchi ishi muxlislar xotirasida abadiy saqlanadi.
