O‘zbekiston pasporti xalqaro reytingda o‘z o‘rnini yanada mustahkamlab bormoqda. “Henley Passport Index”ning 2026 yil uchun yangilangan ma’lumotlariga ko‘ra, O‘zbekiston 74-o‘ringa ko‘tarilib, fuqarolari 59 ta davlatga vizasiz kirish imkoniyatiga ega bo‘ldi.
Pasport mavqei bosqichma-bosqich yaxshilanmoqda
Ma’lumotlarga ko‘ra, 2023 yilda mamlakat 85-o‘rinda turgan bo‘lsa, 2024–2025 yillarda 80-o‘ringa chiqdi. Endilikda esa yana 6 pog‘ona yuqorilab, 74-o‘rinni egalladi. So‘nggi 2,5 yil ichida umumiy o‘sish 11 pog‘onani tashkil etmoqda — bu esa ijobiy dinamikani ko‘rsatadi.
Markaziy Osiyodagi holat
Mintaqa davlatlari orasida Qozog‘iston pasporti nisbatan kuchli pozitsiyada bo‘lib, 78 ta davlatga vizasiz kirish imkonini beradi. Qirg‘iziston esa O‘zbekiston bilan bir qatorda 73–74-o‘rinlarda joylashgan.
Tojikiston fuqarolari 53 davlatga vizasiz kirib, 79-o‘rinni egallagan bo‘lsa, Turkmaniston pasporti 45 davlat bilan 87-o‘rinda qayd etilgan.
Rossiya va qo‘shni davlatlar
Rossiya 113 ta yo‘nalish bilan 44-o‘rinda, Belarus 58-o‘rinda, Ozarbayjon esa 67 ta davlat bilan 66-pozitsiyada joylashgan.
Dunyo yetakchilari
Reytingda Singapur birinchi o‘rinni egallab, 192 ta davlatga vizasiz kirish imkonini bermoqda. Shuningdek, Yaponiya va Janubiy Koreya ham kuchli uchlikdan o‘rin olgan — ularning fuqarolari 187 ta davlatga vizasiz sayohat qilishi mumkin.
Yetakchi davlatlar ro‘yxatida shuningdek BAA, Shvetsiya, Belgiya, Daniya, Finlyandiya, Fransiya, Germaniya, Irlandiya va Italiya kabi mamlakatlar ham bor.
Reyting oxiri
Eng past ko‘rsatkich Afg‘oniston pasportiga tegishli bo‘lib, faqat 24 ta davlatga vizasiz kirish imkoniyati mavjud. Shuning ortidan Suriya, Iroq, Yaman, Pokiston, Somali, Shimoliy Koreya, Nepal, Bangladesh, Eritreya, Shri-Lanka va Falastin kabi davlatlar joy olgan.
“Zamin”ni Telegramʻda oʻqing!
