«Real» transfer bozorida shov-shuvli xaridga tayyorlanmoqda: nishon Bundesliga yulduzi!

Madridning «Real» klubi kelgusi transfer bozorida tarkibini kuchaytirish uchun jiddiy tayyorgarlik ko‘rmoqda. Ayniqsa, hujum chizig‘ida Karlo Anchelotti jamoasi uchun yangi futbolchiga ehtiyoj yuqori ekanligi ma’lum. «Qirollik klubi» bu boradagi asosiy maqsadlaridan biri sifatida Germaniyaning «Leypsig» klubi hujumchisi va Sloveniya terma jamoasining yorqin yulduzi Benyamin Sheshkoni belgilab oldi, deb xabar tarqatmoqda "Madrid Universal" nashri.

Ayni paytda 21 yoshni qarshi olgan Sheshko 2023 yildan buyon Bundesligadagi ajoyib o‘yinlari bilan futbol mutaxassislari diqqatini o‘ziga jalb qilmoqda. U «Leypsig» libosida o‘tkazgan muddati davomida 39 ta gol urishga muvaffaq bo‘ldi, shundan 21 tasi aynan joriy mavsumda kiritilgan. Yosh futbolchining o‘yin uslubi va yuqori gol hisobi Ispaniyaning bir qator grand klublarini ham o‘ziga jalb qildi. Ular orasida eng mashhurlari – «Real», «Barselona» hamda «Atletiko Madrid» jamoalaridir.

Madridliklar safida hozircha Vinisius Junior hamda Kilian Mbappe kabi jahon yulduzlari harakat qilmoqda, biroq klub rahbariyati tipik markaziy hujumchi transferi zarurligini alohida qayd etmoqda. Sheshko esa aynan shunday vazifani bajarishga ideal nomzod sifatida ko‘rilmoqda. U o‘zining jismoniy kuch-quvvati, aniq zarbalari va raqib darvozasi oldidagi mahoratli harakatlari bilan jamoaning qanot hujumchilari imkoniyatlarini yanada oshirishi mumkin.

«Leypsig» o‘z yulduzining transferi uchun katta summa talab qilmoqda. Avvalroq transfer narxi 100 million yevro atrofida baholangan edi. Ammo nemis klubi mavsum yakunlariga ko‘ra Chempionlar Ligasiga chiqa olmasa, ushbu summa sezilarli darajada pasayishi va taxminan 80–90 million yevro atrofiga tushishi mumkin.

Sheshkoning «Leypsig» bilan shartnomasi 2029 yilga qadar davom etadi, ammo klub futbolchi uchun yaxshiroq takliflar bo‘lsa, ularni muhokama qilishga tayyorligini bildirgan. Shu sababli «Real» tezroq harakat qilishi kerak bo‘ladi, chunki futbolchiga «Barselona» va «Atletiko» klublari ham jiddiy qiziqish bildirmoqda. Kataloniyaliklar va «matraschilar» yosh iste’dodni o‘z saflariga jalb qilish uchun madridliklar bilan keskin raqobatga kirishishi aniq.

Ispaniya matbuoti xabarlariga ko‘ra, «Real» yaqin orada nemis klubi bilan dastlabki muzokaralarni boshlashi rejalashtirilgan. Shuningdek, Sheshkoning o‘zi ham Ispaniya La Ligasida o‘ynashga qarshi emas va u katta klubda o‘zini sinab ko‘rishga tayyorligini bir necha bor ta’kidlagan.

Benyamin Sheshko transferi yangi mavsumda «Real»ning hujum chizig‘ida yangi davr boshlanishiga sabab bo‘lishi mumkin. Futbol muxlislari esa ushbu qiziqarli kurashni diqqat bilan kuzatib borishmoqda. “Zamin”ni Telegramʻda oʻqing!