Kambodjaning yetakchi jamoalaridan biri sanaladigan “Visakxa” tarkibida to‘p surib kelayotgan o‘zbekistonlik yarimhimoyachi Alisher Mirzayev uchun mamlakatdagi besh yillik faoliyat yangi burilish bilan yakunlandi. Uning Kambodjada doimiy yashab, mahalliy futbol tizimida o‘z o‘rnini mustahkamlab borgani rasman e’tirof etildi — futbolchi mamlakat fuqaroligini qabul qildi.
Alisher Mirzayev 2020-yilda “Visakxa” klubiga kelgan va shundan beri jamoaning yetakchilaridan biriga aylangan. Qoraqalpog‘istonda tug‘ilgan, o‘zbek futboli maktabida shakllangan bu yarimhimoyachi o‘tgan yillar davomida Kambodja chempionatiga yaxshi moslashdi, o‘yini bilan mahalliy muxlislar nazarini torta oldi.
Uning milliy terma jamoalarimiz safidagi tajribasi ham bejiz emas. Bir paytlar O‘zbekistonning U-16 va U-20 terma jamoalarida 6 marta maydonga tushgan Mirzayev, yoshligidanoq katta istiqbolga ega futbolchi sifatida ko‘rilgan. Endi esa uning xalqaro sahnadagi kelajagi yanada qiziqarli tus olmoqda.
Shu bilan birga, hozircha uning Kambodja milliy terma jamoasiga mart oyidagi FIFA kunlari uchun chaqirilishi haqida rasmiy ma’lumot berilmagan. Terma jamoa murabbiylar shtabi Mirzayevning mahalliy chempionatdagi o‘yinlarini kuzatib boryapti, ammo qaror hali qabul qilinmagan.
Aytish joizki, futbolchining jamoasi “Visakxa” bu kunlarda 12 ochko to‘plab, turnir jadvalida 7-pog‘onani band etgan. Mirzayevning fuqarolik olish jarayoni klubda ham ijobiy kayfiyat uyg‘otdi — bu qaror jamoaning kelgusida mahalliy qoidalarga ko‘ra legionerlar limitida ham qo‘l keladi.
Mirzayev uchun esa bu — yangi hayotiy bosqich, yangi imkoniyatlar eshigi. Kambodjadagi uzoq yillik mehnatining qadrini ko‘rish, mahalliy futbolning to‘laqonli ishtirokchisiga aylanish va ehtimol, mamlakat terma jamoasi safida maydonga tushish — uning oldida turgan yangi maqsadlardir.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
