Yangi mavsum arafasida oldiga katta maqsadlar qo‘yayotgan «Andijon» futbol klubi seleksiya ishlarini jadal davom ettirmoqda. Bu gal jamoa O‘zbekiston chempionati muxlislariga yaxshi tanish, samaradorligi bilan nom qozongan serbiyalik to‘purar Dragan Cheranni o‘z safiga qo‘shib oldi. Ta’kidlash joiz, tajribali hujumchi o‘tgan mavsumni Qarshining «Nasaf» jamoasi tarkibida o‘tkazgan edi.
1987 yil 6 oktyabrda tug‘ilgan Cheran faoliyati davomida turli mamlakatlar chempionatlarida o‘z so‘zini aytgan. U bungacha «Smederevo 1924», «Vesterlo», «Xapoel Xayfa», «Makkabi Netaniya», «Simurg‘», «Xadjer», «Vardar», shuningdek, O‘zbekistonda «Paxtakor» va «Nasaf» kabi nufuzli klublar sharafini himoya qilgan.
Serbiyalik forvardning O‘zbekistondagi karerasi 2016 yildan boshlangan bo‘lib, u qisqa fursat ichida Superliganing eng xavfli hujumchilaridan biriga aylandi. Ayniqsa, 2019–2024 yillar oralig‘ida ketma-ket olti marta chempionat to‘purari bo‘lgani Cheran nomini tarixga muhrlab qo‘ydi. Bu natija hozirgacha Superligada takrorlanmagan rekord hisoblanadi.
Statistikaga nazar tashlasak, Dragan Cheran umumiy faoliyati davomida 538 ta uchrashuvda maydonga tushib, 239 ta gol urgan va 57 marta jamoadoshlariga hal qiluvchi uzatma bergan. Faqat O‘zbekiston Superligasining o‘zida u 226 o‘yinda 147 bor raqib darvozasini ishg‘ol qilgan.
Titullar borasida ham Cheranning hissasi salmoqli: u 5 marta O‘zbekiston chempioni, 3 karra Superkubok sohibi va 2 marta mamlakat Kubogini qo‘lga kiritgan.
Endi esa bu tajriba va gollar «Andijon» manfaati yo‘lida xizmat qiladi. Muxlislar umidi katta: Cheranning kelishi bilan jamoaning hujum chizig‘i yanada o‘tkir va samarali bo‘lishi kutilmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
