Amazon kompaniyasi Prime Video ilovasiga “Clips” deb nomlangan qisqa videolar tasmasini qo‘shganini e’lon qildi. Dastlab AQSh foydalanuvchilari uchun taqdim etilayotgan ushbu funksiya tomoshabinlarni qiziqtirish va ularni to‘liq filmlar yoki seriallarni ko‘rishga undash maqsadida yaratilgan. Bu haqda Techcrunch.com xabar beradi.
Foydalanuvchilar ushbu qisqa videolar orqali filmlarni o‘z kuzatuv ro‘yxatiga qo‘shishi, do‘stlari bilan ulashishi yoki obuna orqali to‘liq kontentga kirish huquqini olishi mumkin. Prime Video global ilovalar tajribasi direktori Brayan Griffinning so‘zlariga ko‘ra, bu yangilik foydalanuvchilarga o‘z qiziqishlariga mos keladigan qisqa lavhalar orqali yangi kontentni osonroq topish imkonini beradi.
Amazon ushbu funksiyani avvalroq NBA mavsumi davomida sinovdan o‘tkazgan edi. Hozirgi kunda Netflix, Peacock, Tubi va Disney kabi platformalar ham xuddi shunday yechimlardan foydalanmoqda. Bu usul tomoshabinlarning platformada ko‘proq vaqt o‘tkazishiga va yangi seriallarni kashf etishiga xizmat qiladi.
Clips funksiyasi hozircha iOS, Android va Fire planshetlarida cheklangan foydalanuvchilar uchun mavjud. Yoz oylariga kelib esa ushbu funksiya kengroq auditoriyaga taqdim etilishi rejalashtirilgan. Foydalanuvchilar ilovaning bosh sahifasidagi maxsus karusel orqali vertikal formatdagi videolarni tomosha qilishlari mumkin.
“Zamin”ni Telegramʻda oʻqing!
