T-Bank jamoasi xalqaro pul oʻtkazmalari geografiyasi sezilarli darajada kengayganini eʼlon qildi. Endilikda bank mijozlari Vyetnam, Filippin, Singapur, Fransiya va Germaniya kabi 61 ta davlatga pul mablagʻlarini yuborishlari mumkin. Bu haqda Ixbt.com xabar beradi.
Yangi xizmat orqali oʻtkazmalarni amalga oshirish uchun qabul qiluvchining karta raqami va FIO maʼlumotlarini koʻrsatish kifoya. Mablagʻlar darhol qabul qiluvchining hisobiga oʻtkaziladi. Ilgari bu imkoniyat faqat Xitoyda chiqarilgan UnionPay Global kartalari uchun amal qilgan boʻlsa, endilikda ushbu 61 ta davlatning istalganida chiqarilgan kartalarga pul yuborish imkoniyati yaratildi.
Tizimning qulayligi shundaki, karta egasi qayerda boʻlishidan qatʼi nazar, oʻtkazma muvaffaqiyatli amalga oshiriladi. Masalan, Oʻzbekistonda chiqarilgan karta egasi Fransiyada boʻlsa ham, unga pul yuborish mumkin. Oʻtkazmalar rubl yoki boshqa valyutalarda amalga oshirilishi mumkin, bunda mijozdan valyuta hisobvaragʻiga ega boʻlish talab etilmaydi.
Komissiyasiz oʻtkazmalar uchun oylik limitlar belgilangan: obunasi boʻlmagan foydalanuvchilar uchun 20 ming rublgacha, Pro obunasi bilan 50 ming rublgacha va Premium xizmati bilan 100 ming rublgacha. Oʻtkazmalarni T-Bank ilovasidagi «Toʻlovlar» boʻlimi orqali amalga oshirish mumkin.
“Zamin”ni Telegramʻda oʻqing!
