Мюнхенда хавфсизлик бўйича конференция бошланмоқда

^{Фото: REUTERS}
Германияда Хавфсизлик бўйича Мюнхен конференцияси бошланмоқда. 16 февралга қадар давом этадиган мудофаа ва хавфсизлик соҳаси масалаларига бағишланган саммитда 60 га яқин давлат раҳбари ва 150 нафар вазир иштирок этади.

2025 йилги конференциянинг асосий мавзуси — Россия-Украина уруши ва томонлар ўртасида тинчлик музокараларини ўтказиш имкониятини кўриб чиқиш. Шунингдек, иштирокчилар Яқин Шарқ ва Суриядаги вазиятни ҳам муҳокама қилади.

Конференциянинг асосий иштирокчилари — АҚШ вице-президенти Жей Ди Вэнс, АҚШ давлат котиби Марко Рубио ва Украина президенти Володимир Зеленский. Шунингдек, делегациялар ўзаро музокаралар ўтказиши ҳам кутилмоқда. Зеленский ва Вэнс учрашуви 14 феврал санасига режалаштирилган.

Президент Доналд Трамп ҳам Мюнхендаги конференция доирасида АҚШ, Россия ва Украина вакиллари музокаралар ўтказишини эълон қилганди. Саммит ташкилотчиларининг маълум қилишича, россиялик амалдорлар тадбирда иштирок этмаяпти.

Бундан ташқари, конференцияда Европа бўйлаб сафарларда юрган Трампнинг Россия ва Украина бўйича махсус вакили Кит Келлог ҳам қатнашади. АҚШ Давлат департаментининг маълум қилишича, унинг мазкур сафарлардаги вазифаси — «президент Трампнинг Украинада тинчликни куч ёрдамида таъминлашни тарғиб қилиш ва АҚШ миллий хавфсизлиги манфаатларини илгари суришдан иборат». Келлог Вашингтоннинг Европадаги иттифоқчилари билан учрашувлар ўтказиши кутилмоқда.

Форум бошланишидан бир неча кун олдин АҚШ президенти Доналд Трамп Владимир Путин ва Володимир Зеленский билан қўнғироқлашиб, урушни тугатиш бўйича музокаралар бошлашга келишиб олганини эълон қилганди. Бу Вашингтон ва Киевнинг Европадаги иттифоқчилари орасида хавотир уйғотди, чунки Украинада тинчлик ўрнатиш бўйича уларнинг позицияси инобатга олинмаслиги мумкин. “Замин” янгиликларини “Telegram”да кузатиб боринг