Зеленский Россия билан тинчлик музокараларига тайёр эканини айтди: Москва қандай жавоб беради?

Украина президенти Владимир Зеленский ва Европанинг йирик давлатлари етакчилари, АҚШ президенти Доналд Трамп билан телефон орқали ўтказилган музокаралар чоғида муҳим баёнот билан чиқишди. Улар агар Россия билан 30 кунлик тўлиқ ва ҳеч қандай шартсиз ўт очишни тўхтатиш келишувига эришилса, Украина тўғридан-тўғри тинчлик музокараларини бошлашга тайёрлигини билдирди. Бу ҳақда Axios ахборот агентлиги ўз манбаларига таяниб хабар тарқатди.

Мазкур муҳим мулоқот «Кўнгиллилар коалицияси»нинг Киевда бўлиб ўтган йиғилиши давомида амалга оширилган бўлиб, унда Зеленский билан биргаликда Британия бош вазири Кир Стармер, Франция президенти Эммануэл Макрон, Германия канцлери Фридрих Мерц ҳамда Польша бош вазири Доналд Туск иштирок этган.

Трамп билан ўтказилган телефон мулоқотида, иттифоқчи мамлакатлар раҳбарлари, агар Россия президенти Владимир Путин мазкур ташаббусни рад этишга қарор қилса, Европа давлатлари томонидан Россияга қарши янада кучли иқтисодий санкциялар жорий этилишини таъкидлаганлар.

Axios манбасига кўра, Доналд Трамп Украина раҳбарининг ўт очишни тўхтатиш таклифини қабул қилганидан ва Киевнинг Россия билан тинчлик музокараларига тайёр эканлигини маълум қилганидан «жуда мамнун» эканлигини билдирган.

«Президент Трамп Киев ва Европа пойтахтлари унинг ташаббусини қўллаб-қувватлаганидан мамнун. Энди биз Москвадан жавоб кутаяпмиз», — дейди агентлик манбаси.

Ўз навбатида, Россия президентининг матбуот котиби Дмитрий Песков бу таклифга муносабат билдирди. Унинг таъкидлашича, бу таклиф янги йўналиш бўлиб, Россия бу масалада чуқур ўйлаб кўриши керак.

«Албатта, бу биз учун янги вазият. Биз ҳар қандай ҳолатда ўз позициямиздан келиб чиқамиз. Ҳозирги пайтда Европанинг бизга нисбатан қандай муносабатда эканлигини кўриб турибмиз. Европа бизга қарши фаол ишламоқда ва биз буни очиқ кўряпмиз, тушуняпмиз. Лекин Россия ҳар доим бу каби босимларга қарши туриб келган ва бунга кўникиб қолган», — деди Песков.

Халқаро таҳлилчиларнинг фикрича, агар 30 кунлик сулҳ шартномаси амалга ошса, бу Украина-Россия ўртасидаги можарони тинч йўл билан ҳал қилиш учун муҳим қадам бўлиши мумкин. Аммо бунинг учун Кремльнинг жавоби ҳал қилувчи аҳамиятга эга бўлади.

Ҳозирча, дунё ҳамжамияти Россия раҳбариятининг бу таклифга расмий муносабатини кутмоқда. Шу билан бирга, Европа ва АҚШ мазкур масалада Кремлга нисбатан иқтисодий ва сиёсий босимни кучайтиришга тайёр эканлигини намойиш қилмоқда. Бу эса вазият янада кескинлашиши ёки тинчликка йўл очилишида муҳим рол ўйнаши мумкин. «Замин»ни Telegram’да ўқинг!