Яқин Шарқда яна бир бор кескинлик ошиб бормоқда. 17 июн куни Эрон Ташқи ишлар вазирлиги томонидан эълон қилинган расмий баёнотда айтилишича, Исроил ҳарбий кучлари томонидан Теҳрон шаҳрининг шимолий ҳудудларига амалга оширилган ҳаво ҳужуми оқибатида камида 17 нафар фуқаро ҳаётдан кўз юмди.
Расмий маълумотларга кўра, ракеталар шаҳардаги тиббий муассаса яқинидаги йўлга тушган бўлиб, айнан ўша пайтда кўчада ҳаракатланаётган автомобиллар ва йўловчилар тўғридан-тўғри зарбага учраган. Ҳалок бўлганлар орасида ҳомиладор аёл, вояга етмаган ёш бола ва уч ёшли гўдак ҳам борлиги маълум қилинди.
Эрон ТИВ баёнотида, шунингдек, ҳужум натижасида сув қувури портлаши оқибатида юзага келган тошқин ҳақида ҳам маълумот берилган. Айни фалокатда бир нечта уй ва инфратузилмалар зарар кўрган. Сув тошқинида бир бола чўкиб кетгани айтилмоқда.
Рақамлар бўйича, ушбу ҳужумда яна 46 нафар фуқаро тан жароҳати олган, улардан баъзилари оғир аҳволда касалхоналарга етказилган.
Исроил томони ушбу ҳужумга оид расмий баёнот бермаган, бироқ минтақадаги вазият тобора чигал тус олиб бормоқда. Ҳарбий ҳаракатлар тинч аҳолини нишонга олаётгани ҳақидаги даъволар эса халқаро ҳамжамиятда кескин норозилик уйғотмоқда.
Мутахассислар бу каби зарбалар минтақада нафақат сиёсий, балки гуманитар инқирозни ҳам кучайтиришини таъкидлашмоқда. Шу сабабли, халқаро ташкилотлар зудлик билан вазиятга аралашиб, тинчлик йўлида музокараларга чақириши зарур бўлмоқда. «Замин»ни Telegram’да ўқинг!
Ctrl
Enter
Хато топдИнгизми
Иборани ажратиб Ctrl+Enter тугмасини босинг Мавзуга оид янгиликлар
