Украина разведкачисини ўлдиришда гумон қилинган 2 киши ўлдирилди

Украина хавфсизлик хизмати (СБУ) томонидан маълум қилинишича, Кйивда юқори мартабали разведка зобити ўлдирилганидан сўнг, Россия хавфсизлик хизматига (ФСБ) алоқадор икки агент ўлдирилган. Бу ҳақда BBC хабар берди.

Украина хавфсизлик хизмати раҳбари Васйл Малюк якшанба куни видеомурожаат билан чиқиб, Россия фойдасига жосуслик қилган икки шахс “қамоққа олинаётганда қаршилик кўрсатгани” туфайли йўқ қилинганини билдирди.

Бу баёнот 10 июл куни Украина разведкаси полковниги Иван Воронич пойтахт Кйивда отиб ўлдирилганидан сўнг янгради. CCТВ камераларидан олинган кадрларга кўра, воқеа эрталаб соат 09:00 атрофида, Кйивнинг жанубий Ҳолосийивский туманида рўй берган. Кадрда Воронич бинодан чиқиб кетаётганида унга қараб югураётган номаълум шахс акс этган.

СБУнинг маълумотларига кўра, гумонланувчилар Вороничнинг ҳаракатларини олдиндан кузатган ва унга суиқасд уюштириш учун махсус тўппончани яширин жойдан олишган. У ўлдирилгач, жиноятчилар яширинишга ҳаракат қилган, бироқ СБУ ва миллий полиция олиб борган қўшма тергов натижасида улар аниқланган ва зарарсизлантирилган.

Украина миллий полицияси ўлдирилган шахслар хориж фуқаролари эканини айтди, аммо батафсил маълумот тақдим этмади. Россия расмийлари ҳозирча бу борада ҳеч қандай изоҳ бермаган.

СБУ, асосан, ички хавфсизлик ва қарши разведка масалалари билан шуғулланса-да, 2022-йилда Россиянинг тўлиқ босқини бошланганидан сўнг, Россия ҳудудидаги саботаж ва махфий операцияларда ҳам фаол иштирок этиб келмоқда. 2024-йил декабрида Россиянинг юқори лавозимли генерали Игор Кирилловнинг ўлими ҳам СБУ операцияси натижаси бўлган. Шунингдек, 2025-йил апрелида Москвадаги портлашда ҳалок бўлган генерал Ярослав Москалик ҳужуми учун ҳам Москва Киевни айблаган.

Шунга қарамай, Украина бу операциялар учун расмий жавобгарликни тан олмаган.

Бу ҳодисалар Россиянинг Украинага қарши ҳаво ҳужумлари сони кескин ошган бир даврга тўғри келмоқда. Украина президенти Володимир Зеленский ҳафтанинг бошида мамлакат Россиядан энг йирик ҳаво ҳужумига учраганини айтди. Бирлашган Миллатлар Ташкилотига кўра, июн ойида Украина сўнгги уч йилдаги энг кўп тинч аҳоли талофатларини қайд этди.

Узоқ давом этаётган урушда ўт очишни тўхтатиш бўйича музокаралар ҳозирча самара бермаган. «Замин»ни Telegram’да ўқинг!