Москва ва Киев ўртасида давлат раҳбарлари даражасидаги тўғридан-тўғри тинчлик музокаралари эртами-кечми албатта амалга ошади ва бу жараёнда Украина томони ғолиб чиқишига ишончимиз комил, деди Украина президенти девони раҳбари Андрей Ермак 29 август куни DW нашрига берган интервьюсида.
«Ҳозир биз дунё ҳамжамиятидан сўраяпмиз – Россияни музокара столига олиб чиқинг, шунда кўрасиз: биз ўша ерда ғолиб бўламиз», — дея қатъий таъкидлади Ермак.
Унинг айтишича, Ню-Йоркда у АҚШ президенти Доналд Трампнинг махсус вакили Стивен Уиткофф билан учрашган ва Киевнинг Украина президенти Володимир Зеленский ҳамда Россия раҳбари Владимир Путин ўртасида юзма-юз учрашув ўтказишга тайёрлигини тасдиқлаган. Бу масала 18 август куни Вашингтонда ўтган Зеленский ва Трампнинг икки томонлама мулоқоти чоғида ҳамда Европанинг бир қатор етакчи давлатлари иштирокида муҳокама қилингани қайд этилди.
«Биз ўтган даврда рўй берган воқеаларни кенг муҳокама қилишимиз зарур эди. Аммо афсуски, Вашингтондаги самарали музокаралардан сўнг Россиядан Оқ уйда муҳокама қилинган икки томонлама учрашувга тайёрлик ҳақида ҳеч қандай аниқ сигнал олмадик. Шу боис, Украина томонининг ҳар доим конструктив ҳамкорликка тайёр эканини яна бир бор таъкидлаш муҳим эди», — дея сўзини якунлади Ермак.
Шу тариқа, Киев Москва билан бўлажак музокараларда фақат дипломатик жараённи эмас, балки сиёсий жиҳатдан ҳам ғолибликни қўлга киритиш ниятида эканини очиқ ифода этди. Мавзу яқин ҳафталарда халқаро майдонда янада қизғин баҳсларга сабаб бўлиши шубҳасиз.
«Замин»ни Telegram’да ўқинг!
