АҚШ президенти Дональд Трамп "Air Force One" бортида ОАВ вакилларига берган интервьюсида Украинага оид тинчлик концепцияси 28 та банддан 22 тагача қисқартирилганини расман эълон қилди. У бу билан аввалги хабарлардаги 19 бандга қисқартирилди деган маълумотларга ойдинлик киритди.
"Режа эмас, концепция эди"
Журналистлар Трампдан айрим республикачиларнинг дастлабки лойиҳа Россия учун жуда қулай эканлиги ҳақидаги эътирозларига жавоб беришни сўрашди. Трамп бунга жавобан:
«Бу якуний режа эмас, балки дастлабки тушунча (концепция) эди. Музокарада 28 банд кўриб чиқилди ва уни 22 тагача қисқартиришди. Кўп бандлар бўйича жуда яхши ечимлар топилди. Энди натижасини кўрамиз», – деди.
Ҳудудлар ҳақида очиқ талаб
Трамп Украина Россияга ҳудудлар борасида ён бериши зарурлигини яна бир бор қатъий таъкидлади. У фронтдаги оғир вазиятни мисол қилиб кўрсатиб, Киевни кескин танлов олдига қўйди:
«Ҳаммаси бир йўналишда кетяпти. Ёки сиз 50–60 минг одамни яна йўқотиб, урушни давом эттирмоқчимисиз? Ёхуд ҳозир ечим топмоқчимисиз?»
Москвага юқори мартабали сафар
Қўшма Штатлар президентининг айтишича, махсус вакили Стивен Уиткофф келаси ҳафта Москвага сафар қилиб, Россия президенти Владимир Путин билан тинчлик режаси бўйича музокаралар олиб боради. Шунингдек, музокараларда иштирок этаётган унинг куёви Жаред Кушнер ҳам пойтахтга сафар қилиши мумкинлигини билдирди. Аввалроқ, ABC News бу лойиҳадан Украина Қуролли Кучлари сонини қисқартириш ва тўлиқ амнистия ҳақидаги баҳсли бандлар чиқариб ташланганини ёзган эди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
