Саудия Арабистони Ҳаж ва умра вазирлиги «Умра–2026» мавсуми бўйича муҳим муддатлар ва чекловларни эълон қилди. Бу ҳақда Ўзбекистон мусулмонлари идораси Ҳаж ва умра маркази маълум қилди. Энг асосийси — ҳаж мавсумига тайёргарлик бошланиши олдидан умра зиёрати маълум вақтгача вақтинча тўхтатилади.
Шу боис, умра ниятида юрганлар сафар режасини “кейин кўрамиз”га ташлаб қўймасдан, аниқ саналарга қараб тузиб олиши керак. Чунки бу ерда кечикиш — билет эмас, бош оғриғи.
Мавсум бўйича асосий уч муддат
Вазирлик маълумотига кўра, «Умра–2026» доирасида қуйидаги саналар ҳал қилувчи ҳисобланади:
Умра визасини расмийлаштиришнинг охирги куни — 2026 йил 19 март.
Хорижлик зиёратчиларнинг мамлакатга кириши учун сўнгги муддат — 2026 йил 2 апрель.
Барча зиёратчиларнинг мамлакатдан чиқиб кетиши учун охирги муддат — 2026 йил 18 апрель.
Яъни: визани 19 мартдан кейин “очиб беринг” деб бўлмайди, 2 апрелдан кейин кириб бўлмайди, 18 апрелдан кейин қолиб кетиш эса умуман яхши ғоя эмас.
Нима учун бу жуда муҳим?
Қайд этилишича, виза шартларини бузиш, белгиланган муддатдан ортиқча қолиш каби ҳолатлар учун Саудия Арабистони қонунчилигида қатъий чоралар бор. Шунинг учун сафарни таниш-билишга эмас, календарга суянган ҳолда режалаштириш керак.
Зиёратга тайёрланаётганлар учун тезкор маслаҳатлар
Визани охирги ҳафталарга қолдирманг: ҳужжат, рейс, меҳмонхона — барчаси бир-бирига боғлиқ.
Кириш ва чиқиш санасини албатта текширинг: “бир-икки кунга чўзиб юраман” деган фикр бу ерда ўтмайди.
Маршрут ва қайтиш билетини олдиндан ҳал қилинг: 18 апрель — “йўқ, ҳали бироз қоламан” санаси эмас.
Хулоса: умрага бориш — ният ҳам, масъулият ҳам. Саналарни ушлаб қолсангиз, сафарингиз ҳам хотиржам, ибодатингиз ҳам шошилмасдан ўтади.
