Азизлар, бугун футбол ҳақида гаплашамиз. Охирги вақтларда миллий жамоа мураббийи мавзуси муҳокама марказида. ЎФА негадир аввалига германиялик Йоахим Лёв билан, кейин португалиялик Паулу Бенту билан музокара ўтказди. Бири рад этди, иккинчиси таклифни ўрганишга келиб, қайтиб кетди. Ва шу ўринда ўзбекистонлик футбол мухлисларида савол пайдо бўлди: нега ахир? Ўзбекистонни тарихда биринчи марта мундиалга олиб чиққан Кападзенинг нимаси ёқмаяпти сизга?
Кападзе қолиши керак
Менимча, Темур Кападзе камида океан ортидаги Жаҳон чемпионатининг энг охирги ўйинигача Ўзбекистон миллий жамоаси бош мураббийи лавозимида қолиши шарт. Уни ҳозирми, мусобақадан олдинми, мундиалнинг биринчи туридан кейинми ишдан кетказиш ХАТО бўлади! Мураббийни ўзгартиришни муҳокама қилишнинг ўзи тушунарсиз қарор. Кападзе қийин паллада Ўзбекистонни қабул қилиб олди. Унинг қўл остида жамоа бирор марта ютқазмади. Теҳронда Эрондан очко олди, Қатарга қарши баҳсда саралаш босқичидаги энг ёрқин ўйинини кўрсатди. Ички муҳитда ҳам муаммо бўлгани йўқ, футболчилар мураббийни алмаштиринглар, деб чиққани йўқ (чиқса билардик).
Одатда мураббийни алмаштириш ёки қониқарсиз натижалар ёки мухлислар талаби билан амалга оширилади. Лекин бизда натижа ҳам, ўйин ҳам жойида, мухлислар ҳам Кападзедан мамнун. Унда ўзбек футболида тарих яратган мураббийга очиқчасига ҳурматсизлик қилиб, у ишдан кетмаган бир пайтда бошқа мураббийлар билан музокара ўтказиб юриш нимага керак? Ишонинг, Кападзе ишсиз қоладиган мураббий эмас, чемпионатдаги бир нечта кучли жамоалар Копанинг йўлини пойлаб ўтирибди, у кетиши билан мўмай пул ва шартнома таклиф қилишади. Хориждан ҳам таклифлар бўлиши аниқ, ахир ҳеч қачон жаҳон чемпионати кўрмаган жамоани орзусига етиштирган мураббийлар кўп эмас.
Чет элнинг «хўрозқанди»
Бенту ва Лёв каби мураббийлар билан музокара қилинганидан бир хулосага келиш мумкин: футбол раҳбариятидагилар шунчаки Ўзбекистон миллий жамоасини хорижлик ва машҳур мураббий бошқаришини истамоқда. Танланган номзодларни қаранг: бири «алмисоқдан бери» ишсиз юрган немис, бири БАА мураббийлигида Ўзбекистонга қарши ҳеч нима қила олмаган португал. Ҳатто тожик нашрлари ҳам Ўзбекистон биз Осиё кубогидан чиқариб юборган БААнинг мураббийини олиб келяпти экан, деб тролл қилишди.
Ёки яна бир сабаб бўлиши мумкин: футбол раҳбарияти жаҳон чемпионатида муваффақиятсиз натижа бўлишидан қўрқиб, гўёки кучли мураббий олиб келмоқчи. Ахир кучли мураббий келса, масъулият ҳам унинг гарданида қолади-да, шундайми жаноблар? Жуда хорижлик мураббий истаётган бўлсангиз, марҳамат – Карло Анчелоттини олиб келинг! Унга Кападзе ҳам хурсанд бўлиб жой бўшатиб беради. Папа Карло билан гаплашган футболчи чиндан жангчига айланади, у учун қўрқинчли рақиб қолмайди. Бу ишни қила оладиган бошқа мураббий йўқ жаҳон футболида.
Жаноблар, спортда адолат деган тушунча бор. Спортни спорт қилган ҳам шу аслида. Ким майдонда энг кўп югурса, ўша ютади. Ғалаба кўп меҳнат қилганга насиб этади. Кападзе Ўзбекистонни жаҳон чемпионатида бошқаришга энг муносиб мураббий.
Сиз Ўзбекистон гуруҳда қолиб кетиши муваффақиятсизлик, фожиа бўлишидан қўрқиб хорижлик мураббий излаяпсиз, лекин ишонинг, биз гуруҳдаги барча ўйинни йирик ҳисобда ютқазсак ҳам бу фожиа бўлмайди. Чунки биз Кападзе билан биринчи марта мундиалга чиқдик, нарвоннинг биринчи палласига оёқ қўйдик, шунинг ўзи натижа. Аввали, Ўзбекистон мундиалдан шарманда бўлиб қайтмаслиги аниқ, футболимиз даражаси жуда яхши. Хорижлик мураббий йўқ нарсани бор қилолмайди.
Ўмонга қарши ўйиндан кейин стадионга борган мухлислар Кападзенинг номини айтиб ҳайқиришди, тармоқда деярли ҳамма унинг қолиши тарафдори, шунинг ўзи сизга хулоса чиқариш учун асос бўлиши керак. Темур футболчилик даврида ҳам, мураббийлик фаолиятида ҳам, майдонда-ю майдондан ташқарида энг ҳурматга муносиб футболчиларимиздан бири, тирик афсонамиз. Унга ўзи яратган тарихни чиройли тугатиш имконини беринг...
Манба: Kun.uz
«Замин»ни Telegram’да ўқинг!
