AQSH Ukrainaga yana to‘rtta HIMARS tizimi va 580 ta Phoenix Ghost dronlarini beradi

^{Foto: delo.ua}
Pentagon Ukrainaga harbiy yordamni yana 270 million dollarga kengaytirganini e’lon qildi. Kiyev HIMARS YAO‘RT va Phoenix Ghost dronlaridan tashqari o‘q-dorilar, tankka qarshi vositalar va boshqa qurollarni oladi.

Ukraina AQSHdan yana to‘rtta HIMARS yalpi o‘t ochish reaktiv tizimi (YAO‘RT) hamda 580 ta Phoenix Ghost zarba beruvchi va razvedkachi dronlarini oladi. 22 iyul, juma kuni AQSH Mudofaa vazirligi Kiyevga umumiy qiymati 270 million dollarlik yangi yordam paketi taqdim etilishini e’lon qildi. Tegishli farmonni shu kuni prezident Jo Bayden imzoladi.

Bundan tashqari, yangi harbiy yordam paketiga to‘rtta qo‘mondonlik-shtab mashinasi, 36 ming dona snaryad, tankka qarshi vositalar, ehtiyot qismlar va boshqa jihozlar kiradi.

Paketga Bayden ma’muriyatining 175 million dollarlik yordami va Ukraina xavfsizligiga ko‘maklashish tashabbusi (USAI) fondlaridan 95 million dollar ajratilgan. USAI fondlari yordami doirasida Vashington Pentagon zaxiralaridan qurol olmaydi, balki ularni sanoat vakillaridan sotib oladi, deyiladi bayonotda. «Ushbu e’lon Ukraina qurolli kuchlariga qo‘shimcha imkoniyatlar taqdim etish bo‘yicha shartnomalar tuzish jarayonining boshlanishini ko‘rsatadi», deyiladi xabarda.

Bayden ma’muriyati ish boshlaganidan beri AQSH Kiyevga xavfsizlik sohasida 8,2 milliard dollarga yaqin yordam ko‘rsatdi. Bundan tashqari, may oyida, Rossiyaning keng ko‘lamli bosqini boshlanganidan taxminan uch oy o‘tgach, AQSH kongressi Ukrainaga 40 mlrd dollar iqtisodiy va harbiy yordam ko‘rsatishga qaror qildi. “Zamin” yangiliklarini “Youtube”da kuzatib boring