Zelenskiy Rossiya bilan tinchlik muzokaralariga tayyor ekanini aytdi: Moskva qanday javob beradi?

Ukraina prezidenti Vladimir Zelenskiy va Yevropaning yirik davlatlari yetakchilari, AQSH prezidenti Donald Tramp bilan telefon orqali o‘tkazilgan muzokaralar chog‘ida muhim bayonot bilan chiqishdi. Ular agar Rossiya bilan 30 kunlik to‘liq va hech qanday shartsiz o‘t ochishni to‘xtatish kelishuviga erishilsa, Ukraina to‘g‘ridan to‘g‘ri tinchlik muzokaralarini boshlashga tayyorligini bildirdi. Bu haqda Axios axborot agentligi o‘z manbalariga tayanib xabar tarqatdi.

Mazkur muhim muloqot «Ko‘ngillilar koalitsiyasi»ning Kiyevda bo‘lib o‘tgan yig‘ilishi davomida amalga oshirilgan bo‘lib, unda Zelenskiy bilan birgalikda Britaniya bosh vaziri Kir Starmer, Fransiya prezidenti Emmanuel Makron, Germaniya kansleri Fridrix Mers hamda Polsha bosh vaziri Donald Tusk ishtirok etgan.

Tramp bilan o‘tkazilgan telefon muloqotida, ittifoqchi mamlakatlar rahbarlari, agar Rossiya prezidenti Vladimir Putin mazkur tashabbusni rad etishga qaror qilsa, Yevropa davlatlari tomonidan Rossiyaga qarshi yanada kuchli iqtisodiy sanksiyalar joriy etilishini ta’kidlaganlar.

Axios manbasiga ko‘ra, Donald Tramp Ukraina rahbarining o‘t ochishni to‘xtatish taklifini qabul qilganidan va Kiyevning Rossiya bilan tinchlik muzokaralariga tayyor ekanligini ma’lum qilganidan «juda mamnun» ekanligini bildirgan.

«Prezident Tramp Kiyev va Yevropa poytaxtlari uning tashabbusini qo‘llab-quvvatlaganidan mamnun. Endi biz Moskvadan javob kutayapmiz», — deydi agentlik manbasi.

O‘z navbatida, Rossiya prezidentining matbuot kotibi Dmitriy Peskov bu taklifga munosabat bildirdi. Uning ta’kidlashicha, bu taklif yangi yo‘nalish bo‘lib, Rossiya bu masalada chuqur o‘ylab ko‘rishi kerak.

«Albatta, bu biz uchun yangi vaziyat. Biz har qanday holatda o‘z pozitsiyamizdan kelib chiqamiz. Hozirgi paytda Yevropaning bizga nisbatan qanday munosabatda ekanligini ko‘rib turibmiz. Yevropa bizga qarshi faol ishlamoqda va biz buni ochiq ko‘ryapmiz, tushunyapmiz. Lekin Rossiya har doim bu kabi bosimlarga qarshi turib kelgan va bunga ko‘nikib qolgan», — dedi Peskov.

Xalqaro tahlilchilarning fikricha, agar 30 kunlik sulh shartnomasi amalga oshsa, bu Ukraina-Rossiya o‘rtasidagi mojaroni tinch yo‘l bilan hal qilish uchun muhim qadam bo‘lishi mumkin. Ammo buning uchun Kremlning javobi hal qiluvchi ahamiyatga ega bo‘ladi.

Hozircha, dunyo hamjamiyati Rossiya rahbariyatining bu taklifga rasmiy munosabatini kutmoqda. Shu bilan birga, Yevropa va AQSH mazkur masalada Kremlga nisbatan iqtisodiy va siyosiy bosimni kuchaytirishga tayyor ekanligini namoyish qilmoqda. Bu esa vaziyat yanada keskinlashishi yoki tinchlikka yo‘l ochilishida muhim rol o‘ynashi mumkin. “Zamin”ni Telegramʻda oʻqing!